IZOPHENDULEKA namhlanje imibuzo abantu bakuleli abanayo ngobudlelwane bezelamani zakwaKhumalo, uKelly noZandie.
Lokhu kuzokwenzeka ohlelweni lukaKelly, iLife with Kelly kwiShowmax.
Isolezwe lithole ngomthombo walo ukuthi laba abangakathi vu ngale ndaba kodwa konke kuzovezwa ohlelweni.
“Bukani uhlelo namhlanje konke kuzocaca khona, izimpendulo zizotholakala khona zonke ezithinta ubudlelwane babo ukuthi kuze kube manje njengoba sebevezile ukuthi konke sekulungile kuqale kuphi,” kusho umthombo.
Kule mpelasonto uZandie ubenzele indodana yakhe umcimbi wokugubha unyaka yazalwa.
Umcimbi ubuhambisana nokubhabhadiswa kwayo ebandleni akhonza kulona.
UZandie ubelokhu ewafakile ama-video kwi-Instagram akhombisa kufika umndeni wakhe okungunina nezingane zikaKelly uChristian noThingo.
Izolo ufake i-video yakhe noKelly, sebethakasela konke okwenzekile.
Abantu abaningi bakujabulele ukuphinda babone lezi zelamani zindawonye.
U-Amy_shezi uthe; “Bukani uNkulunkulu, cha kuhle-ke lokhu. Ngiyakholwa wukuthi umama lapho ekhona ukhala izinyembezi zenjabulo.”
UBandy_k uthe; “Imithandazo yethu iphenduliwe.”
U-iamwealthymomof4 uthe; “Inhliziyo yami ithokozile ngokunibona nindawonye.”
UBuhle masuku1uthe; “Wethembekile esimkhonzayo.”
Zombili izingcingo zikaZandie bezingangeni zamukela umyalezo. NolukaKelly ucingo belungangeni lwamukela imiyalezo.
UZandie waphumela obala ngokungazwani kwakhe noKelly eminyakeni edlule. UKelly wayekhala izinyembezi ohlelweni lwakhe, echaza ukuthi akaboni ukuthi uyophinde amxolele ngesenzo sakhe.