ZIMAPEKETWANE izinto emisakazweni yeSABC Ukhozi FM neMetro FM kulandela ukumiswa kwezilomo zabasakazi ngenxa yokuthamela nokusebenza emicimbini yamaqembu ezepolitiki.
Abasakazi abamisiwe nguTshatha Ngobe owethula uhlelo lwantambama phakathi nesonto kuKhozi FM nozakwabo uZimiphi “Zimdollar” Biyela owenza iDankie 1223 emini phakathi nesonto.
Laba kuvela ukuthi bamiselwe ukusebenza emaralini amaqembu ezepolitiki lapho abebeqashwe khona njengabaphathi bohlelo uma sebefaka abaculi abanandisayo esiteji.
KwiMetro FM kumiswe uLoot Love Shosha okulokhu kuqale isonto akazwakali ohlelweni alwethula ngokubambisana noTbo Touch ngo-3 kuya ku-6 ntambama phakathi nesonto.
Kuthiwa umiswe nozakwabo uLamiez Holworthy ongena ngoMgqibelo, ngemuva kokuthamela irali ye-ANC iSiyanqoba eFNB Stadium ngoMgqibelo.
Ngokuthola kweSolezwe, iSABC inomgomo wokuthi abasakazi bayo bangazihlanganisi namarali amaqembu ezepolitiki abeqhubeka njengoba ebekhankasela ukhetho lukazwelonke.
Abanye abasakazi abese beqalile ukubonakala kumarali kuthiwa bakhunjuzwe ngawo base beyahoxa.
ULoot Love ubonakala nakwi-video i-ANC ebikhankasa ngayo enkundleni yezokuxhumana i-X. Kuyona uyazethula bese eyasho ukuthi ukwiSiyanqoba. Uthi kubalulekile ukuvota futhi abantu kumele benze okufanele.
Abantu bamgxekile futhi leso sikhangiso esesikhombisa ukuthi sesikhishiwe ekhasini le-ANC.
Imizamo yokuthola ukuphawula kweSABC ayiphumelelanga njengoba ithimba lezokuxhumana lingayiphendulanga i-email elithunyelwe yona ngoLwesine ekuseni. Kuhluleke noma lishayelwa ucingo.