ABAZOHAMBELA umcimbi iGcwalisa Spring Picnic All White, eKings Park Stadium, eThekwini kusasa, ngeke kubaphuthe okuzokwenzeka eMoses Mabhida Stadium ngoba kuzokhonjiswa bukhoma.
Lokhu kuvezwe ngomunye wabahleli bomcimbi uKhuzani Mpungose othe umdlalo wamanqamu weMTN 8 phakathi kwe-Orlando Pirates naMaZulu bazowukhombisa ukusuka nokuhlala.
“Sizoba khona i-screen sokubuka ibhola ukuze abantu bengalokhu behla benyuka,” kusho uKhuzani.
Uthe yonke into imi ngomumo ngamalungiselelo omcimbi yize benezingqinamba ezincane.
“Ingqinamba wukushoda kwabaxhasi kodwa siyathemba ukuthi inqola sizoyidudula,” kusho uKhuzani.
Ugqugquzele abantu ukuthi basheshe bafike ngoba amasango azovulwa ngo-10 bese abaculi beqala ukunandisa kusuka ngo-12.
“Ngo-12 umcimbi uyaqala ukuze abantu basheshe babuthole ubumnandi ababufunayo. Lonke iciko lizongena ngesikhathi noma kunabantu abangu-50. Yingakho sikhuthaza abantu ukuthi basheshe bafike ukuze kungabi khona mculi ozobaphutha.”
Abaculi ababoshelwe kulo mcimbi kubalwa kubo yena uKhuzani, Igcokama Elisha, Ntencane, Dumakahle, DJ Tira, Big Zulu, Dlala Thukzin, AKA, Cassper Nyovest nabanye abaningi.
Amathikithi alo mcimbi atholakala eTicketpro ngemali eqala kuR250.