Kulindeleke ukuthi isakazwe okokuqala kuthelevishini imidlalo yebhola yosaziwayo ehlelwa umculi kamaskandi uKhuzani Mpungose.
Lo mqhudelwano uzobe usenkundleni yezemidlalo eTsakane ngeSonto kusuka ngo10 ekuseni kuze kube ihora lesihlanu ntambama, kuzotholana phezulu amaqembu abophele osaziwayo bomculo kamaskandi, hip-hop, owokholo negqom.
La maqembu azobe eholwa uKhuzani, DJ Tira , Dumi Mkokstad noBig Zulu.
Ekhuluma neSolezwe uKhuzani uthe, le midlalo bayiqala bethi into encane kodwa manje ikhombise ukukhula ngendlela eyisimanga nokuyinto ejabulisayo.
“Sihlose ukujabulisa abalandeli bethu ngale midlalo, futhi sihlangane njengamaciko senza esingakujwayele. Okunye okujabulisayo ukuthi iSABC ukhethe ukufaka isandla ngokuthi le midlalo isakazwe bukhoma kuthelevishini. Lokhu kuzokwenza laba abangakwazanga ukufika enkundleni bazibukele besemakhaya, ize iyophela. Siyabonga ezinkampanini ezihlukene ezisixhasile siyacela ukuthi nangonyaka ozayo abanye nabo bafake isandla,” kusho uKhuzani.
Uthe iqembu elizowina kulo nyaka lizokhala limuke nemali enguR250 000.
Abafuna ukuwubuka bukhoma umdlalo amathikithi ayatholakala eComputicket ngoR50.
UKhuzani unxuse abazohambela lo mcimbi ukuthi bafike ngesikhathi enkundleni ngoba konke kuzogoqwa ngosuku olulodwa.
Umdlalo wokugcina uthe uyoqala ngehora lesithathu ntambama.