IZITHAMELI ezizohambela umcimbi wamahlaya kaSimphiwe Shembe, i1st All White Comedy For The Lovers eLime Rooftop eMhlanga ngoFebhuwari 18 kusukela ngo-12.30 emini, zifihlelwe induku emqubeni.
USimphiwe uthe ubophele osomahlaya abahlanu abanohlonze, abaculi noDJ abadumile. Uthe okwenza angabadaluli abazobe benandisa yingoba ufuna abantu bathembe amava akhe futhi ufuna ukubamangaza.
Eqhuba uSimphiwe uthe umcimbi akawenzele izithandani kuphela kodwa wonke umthandi wobumnandi wamukelekile ukuba azozijabulisa futhi agqoke noma yimuphi umbala awuthandayo kodwa ohambisana nomhlophe.
"Inhloso wukujwayeza izethameli zamahlaya ukulandela imigomo ye-comedy ngoba amahlaya awafani namanye amaciko enza olunye uhlobo.
Ngenza isibonelo nje, umculi uyathanda ukushuthwa khona ingoma yakhe izoduma, kepha osomahlaya abadingi ukuba baqoshwe ngomakhalekhukhwini ngoba basuke benzela abantu abakhokhile, basuke bengenzeli abantu abangekho ngoba uma ngenza ihlaya ngomuntu okhona, ngisuke ngenzela abantu abambonayo nabaziyo ukuthi ngikhuluma ngani.
Ngisuke ngingenzeli abangekho nabangaqondi ukuthi leli hlaya lisukaphi."
Uthe uma uzothatha akushoyo ukufake ezinkundleni zokuxhumana, obukayo angacabanga ukuthi wungumuntu ongenalo uzwelo, odelelayo kanti osuke ekhona emahlayeni uyaqonda ukuthi bekuyincoko.
"Okunye uma uthatha umsebenzi wami, uwufaka ezinkundleni zokuxhumana ngokungemvume, usuyaboshiswa manje ngoba uma ubukwa ngabantu abaningi, kusho ukuthi wena uyisa imali kubantu abangayidingi ngokungemvume yami.
Hahaha... manje-ke inkantolo ivuna mina lapho.“
Esephetha uSimphiwe uthe nabantu abafisa ukutheleka nabangani bamukelekile ngoba akubandlululwa muntu. Uthe ukudla neziphuzo kuzobe kutholakala.
Amathikithi atholakala eWebtickets nasezitolo zakwaPick n Pay ngo-R200. Ngemininingwane egcwele kungangenwa kule nombolo yeWhatsApp: 083 343 115.