UHALALISELWE ngabangani nabalandeli umlingisi woMkhokha, uKwezi Ndlovu, oveze ukuthi ubenomgubho wokujabulela ukukhishwa kwelobolo ngeSonto.
UKwezi, odabuka eThekwini, ufake ekhasini lakhe le-Instagram ukuthi wenze umcimbi wokuthakasela ukufika kwamabheka kubo.
Kuvela ukuthi ubelotsholwa usomabhizinisi uSibongiseni “Mageza” Mbambo okuthiwa banezingane ezingamawele abazithole ngasekuqaleni konyaka.
“Goba, Mdunge, Theneza, Mageza ngobisi lwe.... abanye begeza ngamanzi, Jangase! Aww kodwa myeni wami ngibonga iqiniso lakho. Ndabezitha! Nibothi koti, Mrs M, umama wamawele,” kubhala uKwezi ekhasini lakhe.
Kusuka lapho izilokotho ezinhle bezingena zingenile.
Phakathi kwabebemhalalisela kubalwa kubo umsakazi weGagasi FM uDJ Happygal Ndlovu nosaziwayo abahlukene.
UMageza ungumnikazi wendawo yobumnandi iMushroom Lounge eMhlanga, kanti uphinde abe wumhleli wemicimbi.
UKwezi odabuka eClermont, uke walingisa emidlalweni eyahlukene okubalwa kuyo i-The Herd, Isithembiso neminye.