OMREPHA abasafufusa basethubeni lokushiyelana inkundla nezingwazi kwiMaftown Heights Festival eseMary Fitzgerald Square, eGoli ngoNovemba 29.
La mavukana akuleli azohlungwa emncintiswaneni obizwa ngeRap Your Bar with Sunlight. Ngokusho kwabagqugquzeli, omrepha abazodla umhlanganiso bazonandisa engosini ebizwa ngeNew Kidz On The Block.
Kudingeka intsha enekhono emculweni we-hip hop, eneminyaka esukela ku-16 kuya ku-24.
La mavukana aseqalile ukudlana imilala kuTikTok naku-Instagram kuze kushaye uLwesihlanu.
Oyisikhulu sezokukhangisa ngeSunlight e-Afrika eseNingizimu, uNoni Makhanya, uthe ozobaqwaqwada bonke emakhanda kulo mncintiswano, uzokhala amuke nesamba sikaR30 000 futhi i-video azobe engenele ngayo izothola ithuba lokuvezwa kwiMaftown Heights.
Uthe yingqayizivele yethuba elizotholwa wumrepha osacathula ukuba aqhakambise ikhono lakhe phambi kwezinkumbi zabathandi be-hip hop.
"Thina njengeSunlight, sijabule kakhulu ngokuba yingxenye yeMaftown Heights ngomkhankaso wethu obizwa ngeRap Your Bar with Sunlight. Lo mqondo wethu uvuselela umkhiqizo osuthenjwe yizizukulwane ngezizukulwane. Umkhankaso umema intsha ukuba icikoze ngokuthi iSunlight yenzani empilweni yayo, ngokusebenzisa amaphimbo namakhono ayo. Ngokubambisana namaciko asakhula, asigubhi kuphela umkhiqizo wethu oyigugu lethu kodwa ukuxhumana nesizukulwane esilandelayo."
UNoni uthe usekujahe kabi ukubona omrepha benza abadume ngakho. Unxuse omrepha ukuba baqambe ingoma etusa iSunlight Laundry Bar bese bengena kwi-@sunlight nakuTikTok nge-#DropYourBarSunlight, #MaftownHeightsWhoGotNext, #WePlugInYou futhi bangene [email protected] ne-@maftownheights. Ama-likes nama -shares amaningi yikho okuzobeka umrepha ethubeni lokuwina.
Umrepha ozophuma phambili uzoshiyelana inkundla noNadia Nakai, Maglera Doe Boy, A-Reece, Gigi Lamayne, Shane Eagle, Frank Casino, Priddy Ugly, Tellaman, BigStar Johnson, Ginger Trill, Fifi Cooper neWolfpack (Sketchy Bongo, Shekinah noKyle Deutsch).