IGAGASI FM lithe ukubuyisa kwalo owayengumsakazi uNjinga Mpanza kukhombisa ngokusobala ukuthi lesi siteshi asikaze sixabane naye.
UNjinga uqale izolo kwiGagasi lapho esephethe isikhundla sokuba wumphathi wezomculo. Phambilini isikhundla besibanjwe nguDJ Flair osezogxila ekubhekeleleni ukufakwa kwezigaba ezizwakala ezinhlelweni ezahlukene.
UNjinga ushiye kwiGagasi FM ngesikhathi lenza izinguquko eziqale ngo-Ephreli. Wayesohlelweni iGagasi FM Top 40 ngoMgqibelo esiyethulwa nguDJ Sphe Live noPenny Ntuli.
Imithombo yeSolezwe ngaleso sikhathi yathi wacela ukunyuselwa umholo wagcina engayitholanga inkontileka entsha.
Okhulumela iGagasi FM, uKhulekani Shandu, ukuqinisekisile ukuqashwa kukaNjinga.
"Siyajabula ngokubuya kwakhe. Siyamamukela kwiGagasi FM futhi kuyakhombisa ukuthi isiteshi siyikhaya lakhe," kusho uKhulekani.
Uthe ngesikhathi behlukana naye babengaxabene kodwa kwaba khona ukuphambana kwemibono.
"Wayengeneme ngesakubeka etafuleni. Kwakumayelana kakhulu nohlelo ayezoluthola wayesethi khumu embhojeni," kusho uKhulekani.
Uthe njengesiteshi bayaqhubeka nokuvala izikhala ezibalulekile. Uthe ezinye abazivalayo ngezabasophikweni lwezokukhangisa nokufunela isiteshi izikhangiso abamatasa nezinhlolokhono zazo.
UKhulekani uphinde wadalula ukuthi uhamba kahle umncintiswano wokuthungatha umsakazi omusha. Lo msakazi uzongena noMkay Music ohlelweni lwakhe lwangoMgqibelo ntambama.
Imininingwane yokungenela inamekwe emakhasini esiteshi ezinkundleni zokuxhumana nakwi-website yakhona.