UNkanyiso olingisa indawo kaNjeza noNoxolo, odlala ekaLily Dongwe, sebebonakale kwaze kwaba kabili bendawonye. Izithombe ezafakwa kwi-Instagram nguNoxolo engcebeleka olwandle yizo ezishayise amakhala emuva kokuthola ukuthi zazishuthwa nguNkanyiso ngesikhathi bezikhiphile.
Ethintwa uNkanyiso ngala mahlebezi akaphikanga futhi akavumanga kodwa wenqabile ukuphawula. "Ngeke ngiphawule," kushaya uNkanyiso ngezinqamulelayo.
UNoxolo naye akavumanga futhi akaphikanga kodwa ucele ukukhonjiswa lezi zindaba esezisabalele ezinkundleni zokuxhumana. Esethunyelwe zona uzibuke maqede wangabe esalubamba ucingo ukuze aphawule ukuthi uyazi yini ngezinsolo noma cha. UNjeza uwumzala kaLily kuZalo futhi bahlala ndawonye noMaDongwe. Kuwona umdlalo kunesikhathi lapho kwakudingeka khona ukuthi uLily abophe uNjeza emuva kokuhlukumeza intombi yakhe, uNosipho Xulu (okuyindawo elingiswa nguNompilo Maphumulo).
Akukacaci ngekusasa likaNoxolo kuZalo emuva kokuba indawo angumlingisi wayo wadubuleka kudunwa imoto kodwa okwamanje usabuye avele kwiDurban Gen, nayo edidiyelwa yinkampani eyodwa noZalo, iStained Glass. UNjeza usagqunywe ejele ngecala lokuhlukumeza uNosipho. Isolezwe ngoMgqibelo lake labika ukuthi uNkanyiso usethola izinsongo zokwenzakaliswa ngenxa yokuhlushwa kukaNosipho nguNjeza. Kuke kwaba namahlebezi athi useshiyile kuZalo ngenxa yomholo omncane abewuthola kodwa uNkanyiso waphika, waze waze walala ngomhlane, ethi ngamampunge lawo.