ZIYABHIMBA izinto kumethuli wezinhlelo uMinenhle "Minnie" Dlamini, waseThekwini, ngemva kuphela kohlelo lwezemidlalo iHomeground, abelwethula ngoMsombuluko ebusuku kwiMzansi Magic.
Izindaba zokuphela kohlelo abelwethula nozakwabo uLungile Radu, zidalulwe kuqala nguMinnie ekhasini lakhe le-Instagram, ngaphambi kokuqinisekiswa wuMzansi Magic.
UMinnie ubhale ekhasini lakhe ukuthi emuva kweminyaka emine, iHomeground, seyifinyelele ekugcineni.
"Ningakhohlwa ukubukela isiqephu sokugcina ngesonto elizayo ngoMsombuluko kwiSupersport TV nakwiMzansi Magic.
AbeMzansi Magic bathumele isitatimende bezibongela khona kubantu ababambe iqhaza ukuze uhlelo lube yimpumelelo. Kuze kwashaya isikhathi sokushicilela abeMzansi Magic bengaqinisekisanga ukuthi yiluphi uhlelo oluzovala isikhala seHomeground esiteshini sabo.
Yize kuphele uhlelo kodwa uminnie uhambela phezulu kulezi zinsuku emuva kokwethula indawo yakhe yobumnandi neyokudla iThe Mansion, ngoLwesithathu. Umcimbi bewuhanjelwe ngozakwabo nabaculi okubalwa uMusa Keys, Sphectacular, DJ Naves, Hope Mbhele, SK, Andile Ncube nabanye.