LUZOSHUBISA uhlelo oluvumbuulula omakhwapheni balabo abasuke bejolela izithandwa zabo zingazi.
Uhlelo lwe-Uyajola 9/9 oluthakaselwa kakhulu kuleli oselwenze ukuthi umethuli walo, uJub Jub abe nyamanambana kwabesilisa abangathandi kudalulwe imijolo yabo efihliwe, kulindeleke ukuthi luqale ukukhonjiswa kuChannel 157 phakathi kuka-Ephreli noJuni kulo nyaka.
Inhloko yezokuXhumana kuMoja Love uLindiwe Mbonambi, ithe lolu hlelo lusazoqhubeka nokushubisa futhi lushiye abantu besalangazelele ezinye iziqephu.
“Lolu hlelo luzobonakala luhambela zonke izifundazwe njengoba besibona kwenzeka eziqeshini ebezikhonjiswa phambilini. Abantu basazoqhubeka nokubuka iziqephu ezimbili ezilandelanayo ezikhonjiswa imizuzu engu-24,” kuchaza uLindiwe.
Eqhuba uthe uhlelo olukhuluma ngempilo kaZodwa Wabantu nalo luzobonakala kuMoja Love.
Uthe nasohlelweni lukaZodwa, abantu basazoqhubeka nokumangazwa yiziqephu zakhe ezishiya ababukeli bethokozile.
UZodwa uzobonakala eqinisa ubudlelwano bakhe nomndeni wakubo.
Uphethe ngokuthi uhlelo Uyajola 9/9 luzoba neziqephu ezingu-26 kuthi olukaZodwa lube nezingu-13.