UZOQALA ngenyanga ezayo kuSABC1 umdlalo wamahlaya, osuselwe kowaphesheya othi Ugly Betty.
Owakuleli umdlalo uzokwaziwa ngokuthi uBettina Wethu, umlingisi ozobe ehamba phambili ozokwaziwa ngoBettina (Betty) Sikhakhane.
I-SABC1 ikhiphe amazwibela alo mdlalo kodwa yavezela abezindaba ukuthi abalingisi bawo izobamemezela emcimbini onamhlanje eGoli.
Umbhali wezindaba zosaziwayo enkundleni yokuxhumana uTwitter uPhil Mphela, uveze ukuthi imithombo yakhe imtshele ukuthi uSoso Rungqu noBrighton Ngoma bakubalingisi balo mdlalo.
Uqhube wathi zingu-15 iziqephu zalo mdlalo ezisaqoshiwe okwamanje ngalo mdlalo, abafuna ukubona ngazo ukuthi uzokwamukeleka kanjani kubantu bakuleli.
Kulo mdlalo kuvela ukuthi kuzobonakala intombazane esencane ehlala iphupha ngokuba kwezemfashini.
“Yize esebenza kanzima uBettina futhi ezimisela, kukho konke akwenzayo kodwa iphupho lakhe lokungena kulo mkhakha alifezeki kanti livinjwa into eyodwa, yokuthi akabukeki kahle. Konke la ezama khona inhlanhla yokungena emkhakheni wemfashini bakhala ngendlela abukeka ngayo. Ekugcineni uthola ithuba lokuthi abe umsizi womhleli omkhulu nomphathi webhuku iNubia Magazine uDingani Jiyane, okulapho ezinikela khona futhi usebenza kanzima ukuze afeze iphupho lakhe njengoba eseseduzane nomkhakha wokukhangisa,” kuchaza lesi sitatimende.