AZOKHONJISWA kwithelevishini okokuqala ngqa, amaSebenza Women Awards azoba seGateway Hotel ngo-Okthoba 30.
Lezi zindondo eziqhakambisa abesifazane abenza kahle emikhakheni ehlukene, kuzoba kungokwesibili ziba khona. Ngesikhathi ziqala ngonyaka odlule zenzelwa eMfolozi Casino, eMpangeni.
Umsunguli wayo uKini Shandu, uthe kuyabajabulisa ukuthi umcimbi uzokhonjiswa kwiMoja Love (DStv Channel 157).
“Azobe eqoshiwe uma esedlala kwithelevishini ngoba sizofike siwenze, bese esakazwa emuva kwesonto (Novemba 7). Ngisazothola esiteshini ukuthi isikhathi esiqondile azodlala ngaso kuzoba yisiphi,” kuchaza uKini.
Uthe uyajabula ngokusakazwa kwawo ngoba kukhombisa ukuthi ayakhula.
“Sinabantu abafuna ukuba yingxenye yomcimbi esingakaze sicabange ukuthi siyoba nabo,” kuqhuba yena.
Uthe amalungiselelo ahamba kahle ngoba sebehlela izinto ezimbalwa. Uveze ukuthi kulo nyaka kukhona abazomhlonipha ngendondo yeLifetime Achievement Award, okuzobe kungokokuqala ngqa.
“Konke kuhamba kahle, amavoti asevaliwe futhi sijabule kakhulu ngesasasa elikhonjiswe ngabantu. Siyabonga kakhulu. Sesibheke usuku lomcimbi lapho esibheke ukuthi kugqugquzeleke abaningi ngoba inhloso enkulu ngemiklomelo ukugqugquzela abantu.”
Phakathi kwabaqokiwe emikhakheni ehlukene kubalwa uZimdollar Biyela ongumsakazi, Thuso Mbedu umlingisi, Naima Kay umculi, Brenda Mhlongo ongumlingisi, nabanye abaningi.