NOKUBONGWA PHENYANE
UZOQALA ukubonakala emdlalweni iRhythm City ngo-7 ebusuku kwi-e.tv, uZamani Mbatha ozakhele igama emdlalweni Isithembiso kuMzansi Magic.
Abakwa-e.tv bakhiphe isitatimende la bebeveza khona ukuthi uZamani, umfowabo omncane kaNomzamo Mbatha, uzohlanganyela emdlalweni ezolingisa indawo kaPule Ndlovu.
UPule uyindodana kaSuffocate ayithatha ekhaya lezintandane.
“Ukubuya kukaPule kuzokhumbuza ababukeli balo mdlalo okwake kwenzeka ngo-2010. Bazokhumbula emuva okwake kwenzeka okuthinta lo mfanyana esemncane. UPule wake waba khona kodwa engalingiswa nguZamani. Wahamba ebuyela KwaZulu-Natal eya esikoleni esizimele,” kusho isitatimende.
Ukubuya kukaPule kuzoshintsha izinto eziningi kubantu baseRhythm City.
“Ukufika kwakhe kuzodonsa amehlo abaningi ikakhulukazi akaKhulekani noPearl okuyizitha ezinkulu zikaSuffocate. Kuningi okuzokwenzeka njengoba kubuye uPule. Ababukeli bomdlalo bazosala bemangele ngabazokubona. Umbuzo kodwa umile ukuthi kukho konke ngabe uSuffocate ukulungele azobhekana nakho?”
Enkundleni yokuxhumana iTwitter, uZamani uveze ukuthi usekubheke ngabomvu ukuhlangana nababukeli bomdlalo babone ukuthi uPule ubaphatheleni.
UZOBONAKALA kwiRhythm City kusuka namhlanje elingisa indawo kaPule uZamani Mbatha ikhono lakhe lokulingisa eliqale ukubonakala emdlalweni iSthembiso kuMzansi Magic ISITHOMBE: SITHUNYELWE