UZOQALA ngo-Ephreli 4 ngo-8.00 ebusuku kwiMzansi Magic, umdlalo osungulwe ngabashadikazi bakaFerguson, uConnie noShona, iRockville owagcina ukubonakala kwithelevishini ngo-2016.
Lo mdlalo ukhuluma ngemindeni emibili, odla izambane likaPondo wakwaBogatsu nowakwaMabaso ophila impilo ejwayelekile.
Kuwona abalingisi okukhona kubo u-Enhle Mlotshwa (Lindi), Connie Ferguson (Marvis) nomyeni wakhe uShona (JB) noTrevor Gumbi kuvele ukuthi bayabuya kulo mdlalo.
Kwabasha, Isolezwe lithole ukuthi kukhona uThuli Phongolo, Wiseman Zitha nabanye abazomenyezelwa maduzane.
U-Irvin Pooe weMzansi Magic, ukuqinisekisile ukubuya kwalo mdlalo ozongena uma kuphela othi Ehostela ngeSonto esiya kulona.
“Isizini yesihlanu yalo mdlalo imininingwane ngayo soyikhipha khona kuleli sonto njengoba kuke kwaba khona ukubambezeleka. Kodwa wona ngingakuqinisekisa ukuthi nakanjani lo mdlalo uyabuya maduzane esiteshini sethu futhi ugcwele abalingisi abadala kanye nabasha,“ kusho u-Irvin ngamafuphi.
Uveze ukuthi abangabazi ukuthi abantu bazowuthakasela lo mdlalo njengoba kwakwenzeka nasekuqaleni.
Kusuka ngesonto eledlule, bese kunamahlebezi okuthi lo mdlalo uyabuya kwithelevishini kodwa kungekho okuqinisekisayo lokho phakathi kwabasunguli bawo noMzansi Magic.
UShona muva nje, ushayele isipikili sokugcina njengoba efake i-video ekhombisa ukuthi ngempela bamatasa nalo mdlalo.
Abantu bakujabulele ukubona kubuya lo mdlalo baveza ukuthi sebekulindele ngabomvu ukubona ukuthi uphetheni kule sizini.
Abalingisi okukhona kubo uTerry Pheto, Boity Thulo, Brenda Ngxoli, Sello Sebotsane, Thembsie Matu, Shaleen Surtie-Richards nabanye bona akucacanga ukuthi baseyingxenye yalo mdlalo noma abaseyona.
Lesi siteshi kulindeleke ukuthi simemezele izinhlelo ezintsha njengoba eziningi kwezikhonjiswa manje seziyela emaphethelweni.