UMLINGISI osanda kulaxaza umdlalo wethelevishini Uzalo, waphuthunyiswa esibhedlela sabagula ngengqondo, uSiyabonga “Siya B” Radebe, uzobonakala efilimini ekhuluma ngodlame lwamatekisi, ethi Taxi Bosses.
Siyabonga, obelingisa indawo kaVikizitha Magwaza kuZalo, kuthiwa ushiye ngenxa yokungaboni ngaso linye nabadidiyeli bomdlalo. Kuthiwa ingxabano idalwa wumbango wemali ngoba uRadebe ubefuna ukukhushulelwa umholo.
Lo mlingisi, obuye abe ngusomahlaya, ulingisa nabanye ozakwabo abahlonishwayo okubalwa uNdumiso Dlamini wodumo lweFamily Bonds, u-Andile Mxakaza weSibaya, uLerato Mbhele, uNozipho Cele, uRaymond Mkhize noNhlanhla Shelembe.
Okhulumela abakhiqiza ifilimu uXolani "XD Black" Dlamini, uthe umdlalo uzokhonjiswa ngokusemthethweni ngoFebhuwari 16, kusukela ngo-5 ntambama eCinecentre, eSuncoast Casino, eThekwini.
Ngaphambi kokuba ibonwe wumphakathi iTaxi Bosses, izokwethulwa kwabezindaba ngoFebhuwari 1, eStable Theatre, eThekwini. UXD Black uthe izintatheli zizothola ithuba lokudlana indlebe nabalingisi abaqavile efilimini njengoba betheleke ngobuningi babo.
Isolezwe NgoMgqibelo lizibonele amazwibela efilimu lapho kuvezwa khona osomatekisi beyothwala enyangeni bagcine sebengqoklozana ngenhlamvu.