UMLINGISI ozakhele udumo ngokudlala indawo kaGracious "TGOM" Mabuza kwiThe Queen, uRami Chuene, ugonyuluke ngokumenza angasikhulumi isiZulu namaZulu.
Uthe okudala lokho ukuthi amanye amaZulu akafuni ukukhuluma izilimi zezinye izizwe, ikakhulukazi zaseLimpopo futhi baphenduka inhlekisa uma bekhuluma izilimi zabo.
"Sisakhula bebehlale besitshela emakhaya ukuthi uma ungumPedi, ungumTsonga noma ungumVenda, uhlale ubukelwa phansi. Thina sinegazi lobuVenda futhi uma uhlala endaweni eshisa kakhulu, noma kanjani uzoba mnyama bhuqe. Besihlale sifundiswa ukuthi uma siphumela ngaphandle, iningi labantu lizokubukela phansi ngokuthi udabuka kuphi, ubukeka kanjani nokuthi ukhuluma kanjani. Okuyinto eyenzeke kakhulu," kusho uRami kwiMoments with Mantsoe Podcast.
Uthe kunabantu abazitshela ukuthi akakwazi ukukhuluma izilimi zesiNguni.
"Akukhona ukuthi angikwazi ukukhuluma isiZulu nesiXhosa uma ngifuna. Ngiyakwazi. Ukuthi ngiqhakambisa ulimi lwami." Uthe uma kungena umZulu emkhulumisa ngesiZulu, umphendula ngolwakhe aluncela ebeleni.
Uthe usuke efuna ukumkhombisa ukuthi uyamuzwa kodwa ngeke amphendule ngesiZulu.
"Yingoba akekho osuke efuna ukuzehlisa phakathi kwethu. Ufuna kube nguwe ozehlisayo ngokukhuluma ulimi lwakhe." Nakuba kunjalo uthe lokho kuyabasiza bona baseLimpopo.
"Ngicabanga ukuthi amaTsonga yisona sizwe esisheshayo ekufundeni ezinye izilimi. Yingoba yisizwe ebesicindezelwe kakhulu. Lokho kwenze amaTsonga agcina esefunda ukukhuluma izilimi eziningi."
Uveze ukuthi abantu bebehlale behlekisa ngabantu baseLimpopo. "Njengokuthi uma umuntu emubi, kuthiwe ufana neShangane, okuchaza ukuthi nanoma yini ehlangene nomShangane noma nomTsonga yimbi. Uma umuntu onekhala elikhulu kodwa ekhuluma isiZulu, bathi 'Nal'iVenda."
Uthe noma uya eGoli, uyafundiswa ukuthi uma ufika kwaNyamakayipheli, yimba igolide bese uceba ukubedlula bonke ukuze ubaphathe.
"Safikela ukuzokulwa lapha. Wenza isiqiniseko sokuthi uyagqama, uyavelela futhi awuzehlisi. Ungakhohlwa ukuzithoba, ungabi yiqaba nomdlwembe."
Lo mlingisi ukhuthaza abantu ukuthi bazifunde ezinye izilimi zesintu, uphele umkhuba wokucabanga ukuthi olwakho ulimi lwesintu lungaphezu kwezinye.
Uthe njengamanje udlala indawo kwiSono nakwiHow To Ruin Christmas: The Wedding. Usanda kubhala incwadi esihloko sithi We Kissed The Sun And Embraced The Moon. Ngaphandle kokulingisa, uRami ungumculi okhokhelwayo nonebhendi yakhe kodwa onandisa emicimbini yosomabhizinisi kuphela.