OWAYENGUMSAKAZI woKhozi FM uSthandwa Nzuza, uthi yize esegxile ekulingiseni kodwa uma kuvela ithuba lokubuyela emsakazweni uzolamukela.
USthandwa owafundela ukulingisa eDurban University of Technology, usanda kumemezela ukuthi uzojoyina umdlalo omusha waseThekwini iDurban Gen. Lo mdlalo ukhonjiswa ngo-6.30 ebusuku phakathi nesonto kwi-e.tv.
“Ukulingisa nokusakaza ngikuthanda kokubili futhi lezi zinto ziyahambisana kimi. Uma kuvela ithuba lokusakaza manje ngizolithatha hhayi ukuthi kukhona okungcono kunokunye. Okwamanje ukuthi amathuba asavela kwithelevishini kakhulu,” kusho uSthandwa.
Uthe kwiDurban Gen uzodlala indawo kaDkt Zandile Mkhize futhi uzoqala ukubonakala ngoLwesihlanu noma ngesonto elizayo.
“Ngeke ngikwazi ukudalula okuningi ngoba abantu kumele babuke kodwa uZandile uwumngani kaPrecious Dlamini. Uwumngani wakhe wakudala ababefunda naye esikoleni. Uthanda izinto ezimnandi futhi yena unendawo yakhe yokulapha kodwa uke afike nje esibhedlela eDurban Gen,” kuchaza uSthandwa.
Uthe: “Ngesikhathi ngithola ngale ndawo ngavele ngahleka ngibona ngathi kukhulunywa ngami. Nami ngiwumuntu ozikhululekele njengaye futhi ngithanda injabulo yakhe hhayi into ezongikhathaza emoyeni. Uza ngenjabulo.”
Lo mlingisi oke wadlala kuZalo, Ifalakhe nakweminye, uthe uyabonga futhi uyawajabulela amathuba alokhu emvelela.
“Ngibamba amathuba avelayo njengamanje futhi kukhona okunye engiphezu kwakho kwithelevishini kodwa ngiyokhuluma ngakho ngesikhathi esifanele.”
Uthe kubalulekile ukuthi ube ne-agent ezokumela.
“Abakhiqizi bemidlalo batshela bona kuqala ukuthi kwenzekani bese yona iyakwazisa. Kumele kube umuntu ozomthemba ongeke akuqole, okuncane bese uziphatha kahle ungajahi udumo,” kuphetha uSthandwa.