UYADLONDLOBALA kwezokulingisa uSindi Dlathu njengoba engeke esagcina ngokudlala indawo ephambili kwiThe River, kodwa usezoba ngomunye wabadidiyeli bayo.
USindi, owazakhela udumo edlala indawo kaThandaza iminyaka engu-20 kwiMuvhango kuSABC 2, ulingisa indawo kaLindiwe Dikana kwiThe River.
IThe River idlala ngo-8 ebusuku phakathi nesonto bese kuthi amasizini amadala aphinde kuMzansi Magic ngo-7 phakathi nesonto.
"Ngizizwa ngithobekile ngokunikezwa leli thuba lokusebenza ohlelweni olubanakekelayo abantu nokubaluleka komsebenzi esiwenzayo," kusho uSindi.
"Ngiyajabula nangokudidiyela nabantu engibathandayo esengibahloniphe isikhathi eside."
Indawo ayilingisayo kaLindiwe ngeyowesifazane onamandla ongenza noma yini ukuze angahlulwa ngisho nawukubulala njengoba ebuye aziwe ngoMadl'abantu.
Ukuqala ukwenza imisebenzi emibili kuzoqala ngesizini yesine uma sekuphela ekhona manje ngoFebhuwari ngonyaka ozayo.
Kuvela ukuthi izophela ngamandla njengoba kukhona ozofa emuva kwenqwaba yamanga, kuzodlondlobala uthando kube khona abajikelanayo.
Kuzovela noLindiwe njengesikhulu seKhanyisa Diamonds ezama ukungulisa izinto uma abantu ababili benza umsebenzi omkhulu ophenyweni olungase luqumbe phansi umnotho wakhe.
Lo mlingisi akusiye owokuqala ukwenza imisebenzi emibili kulo mdlalo njengoba noFerry Jele, edlala indawo kaVeronica aphinde abe ngumqondisi.
Omunye wabasunguli nomdidiyeli weTshedza Pictures eyenza iThe River, uPhathutshedzo Makwarela, uthe ukuphela kwesizini yesithathu ngoFebhuwari kuzonikeza ababukeli ithuba lokubona ukuthi kumele balindele uLindiwe onjani ngesizini yesine.