UMLINGISI weDurban Gen, uNelisiwe Sibiya, ushiye isigubhukane lapho kuqoshelwa khona lo mdlalo emuva kokuxinwa wukugula angakudalulanga.
UNelisiwe, olingisa indawo kaDkt Mbali Mthethwa, ubhale kuFacebook ukuthi lesi sigameko simehlele ngoLwesine kuleli sonto.
"Kuphoqeleke ukuba ngishiye phansi lapho siqophela khona futhi angibange ngisaqopha. Bengisembhedeni usuku lonke ngoba bengigula." Le ntokazi ithe ithole ithuba lokubheka emuva lapho iphuma khona nalapho ibheke khona ngokwempilo.
"Ngivukwe umunyu futhi ngakhala izinyembezi zenjabulo."
UNelisiwe uthe ukujabulele kakhulu ukulingisa indawo kaDkt Mthethwa futhi angaphinda ayilingise uma engaphinda anikezwe ithuba. Uthe kule sizini yokugcina yalo mdlalo uthole ingqayizivele yethuba akade ayelilangazelele lokuba ngumbhali wezinye zeziqephu zeDurban Gen.
"Isiqephu samanje singithinte kakhulu ngoba singempilo yangempela ngoba singomama wami ongasekho owathwasa, waba yisangoma maqede washiya phansi, wakholwa. (Kodwa) lolu wudaba lwangolunye usuku. Kodwa-ke ngifisa ukubonga wonke umuntu ongesekelayo ngaso sonke isikhathi. Ngiyanithanda bafowethu futhi ngizoqhubeka nokunenza niziqhenye ngami," kuphetha lo mlingisi wodumo lwengoma yeLockdown ethi Mama KaBafana.