Nokubongwa Phenyane
IZINKAKHA zabalingisi uSello Maake kaNcube noTina Jaxa, ngabalingisi abagqamile emdlalweni omusha iVula Vala, ozoqala ukudlala ngeSonto ngo-Okthoba 4, kuMzansi Magic (DStv channel 161) ngo-8 ebusuku.
USello ulingisa indawo kaBra Rex, owayengumdlali webhola odumile kodwa osethathe umhlalaphansi.
Manje useneqembu lakhe kodwa inhliziyo embi anayo nokungabaphathi kahle abantu asebenzisana nabo, yenza kube nzima ukuya phambili neqembu lakhe iWarriors.
UNomsa Philiso ongomqondisi wezinhlelo kwaM-Net, uthe balindele ukuthi lo mdlalo udonse amehlo abantu bakuleli ubashiye benemizwa ehlukene njengoba uzoveza imidlalo yebhola, ezamabhizinisi, ubugebengu nokungathembani kubantu abahlukene.
“Lo mdlalo siwubhalelwe yinkampani iBlack Brain Pictures, uzophinde ugxile kumfana ominyaka yakhe yobudala iko-20, oshiya ikubo eMnambithi ukuyosebenza nomalume wakhe eGoli ngenhloso yokwenza impilo yakubo ibe ngcono.
“Izinto ziyashintsha uma lo mfana owaziwa ngoMzi, esedlala ibhola edlalela iWarriors, okuyiqembu likaBra Rex okuvela izimfihlo ezindala emphakathini,” kuchaza uNomsa.
Uthe lo mdlalo uzogqamisa okwenzeka emindenini yezikhulu nezingqinamba ezibhekana nazo.
“Abantu bakuleli bazosala benkemile ngempela kulo mdlalo othokozisayo. Okunye okuchazayo ngawo, ngabalingisi bawo abazokwenza umdlalo ube nedumela nokuzokwenza ababukeli boMzansi Magic bahlale bethe njo kuwona,” kusho uNomsa.
Kulo mdlalo uTina ozolingisa indawo kaThembi, ongunkosikazi kaBra Rex, osebenza kanzima ukugcina umndeni wakhe ubumbene.
Umlingisi owazakhela igama emdlalweni Isidingo uDarlington Michaels, kulo mdlalo uzolingisa indawo kaGab, oyisigebengu esisemkhakheni wamabhizinisi.