UNYELWE yinyoni esandleni uZodwa eqokwa ukuba ngomunye wabalingisi bomdlalo wocansi.
UZodwa Libram, odume ngelikaZodwa Wabantu uzolingisa okokuqala ngqa empilweni yakhe emdlalweni iBlack Door ozodlala kwi e-tv maduzane.
Le ntokazi eyazakhela udumo ngokudansa ingagqokile, ithe yize izobe ilingisa okokuqala kodwa akuzange kube nzima ngale ndlela ebicabanga ngayo.
"Yonke into ivele yaba lula ngoba bavele bangitshela ukuthi mangibe yimina nje," usho kanje.
Uqhube wathi akazisoli ngesinqumo sakhe asithatha sokuphindela esikoleni ngoba uyakholelwa ekutheni yikona okumbeke la ekhona namhlanje.
"Ngiyabagqugquzela abantu ukuthi babuyele esikoleni. Uma befunda bangalinge bangabaze ngoba kungase kubasebenzele njengoba nami kungisebenzele,"kusho uZodwa.
Ngonyaka ka-2021 uZodwa wathola iziqu zakhe zokulingisa esikoleni iStar Qualitiy Perfoming Arts College.
UZodwa ubuye waveza ukuthi phezu kokuba engumuntu ohlezi ematasa kodwa uzimisele ngokuthi ukulingisa kube ngenye yezinto azenza njalo.
"Ngizimisele ngokwenza noma yini ezongiphonsela inselelo. Angifuni ukulingisa kugcine kube yinto engiyenza nje," kusho yena.