ISIHLABANI somculo kamaskandi, uSenzo "Ntencane" Zondi, sisethubeni lokuzodlela amahlanga kwiClash of the Choirs semuke nesamba sikaR1 million emzuliswaneni wamanqamu kuMzansi Magic ngeSonto ngo-6 ebusuku. Ngaphandle kokuthi amabhinca nabantu baseKZN abacushwa ngevoti kodwa ikhwaya yakhe iyintandokazi ngenxa yamangwevu ewakhiphe kule mizuliswano eyedlule. Ayisinisi amahleza. Beyihlale ituswa ngamajaji uZwai Bala, Buhlebemvelo noDr Tumi
NangeSonto esiphuma kulo iTeam Ntencane, eyaziwa ngelaMabhubesi, iphume phambili kwiTop 4 okwesibili, nokuyenze yangena ngehubo emzuliswaneni wamanqamu, esibhekene kuwo neTeam Vusi Nova. Amajaji akawuvalanga umlomo ngobuchule nobunyoninco beTeam Ntencane bokukwazi ukudidiyela ingoma kaLuther Vandross ethi Power of Love neyeThee Legacy ethi Ngifuna Wena Wedwa. UNtencane uqale ngokubonga abantu ebebemeseka wabanxusa ukuba bamvotele ngobuningi kulo mqhudelwano osuya emaphethelweni.
Eqeda nje ukunxenxa abantu, iningi bese liqalile ukuphonsa amavoti awu-100, umuntu ngamunye.
NgeSonto elizayo kubhekwe ngamehlo abomvu ukuthi iyiphi ikhwaya kwamabili asesele elizodla umhlanganiso.
*Ngemininingwane yokuvota abantu bangena emakhasini asezinkundleni zokuxhumana zeClash of the Choirs nakowoMzansi Magic.