CHARLES KHUZWAYO
UTHUKUTHELE uyaveva umndeni womlingisi weThe Queen, uConnie Ferguson, emuva kokuba umphrofethi Aaron Xhali, ebholofide ukuthi uhlaselwa yisifo somdlavuza.
Kunevideo okuthiwa yaqoshwa enkonzweni ngoJulayi 30 nyakenye, kuzwakala uXhali ethi uthumela umyalezo oyisixwayiso esivela kuNkulunkulu.
"Umyalezo wokuqala awushayangwa ndiva. Ngiyazi ulahlekelwe ngumyeni wakho, Connie Ferguson. Lo myalezo wakhishwa ezinyangeni ezilishumi ezedlule ukuvikela impilo yesithandwa sakho. Nginomyalezo osuqondiswe ngqo kuwe, ovela kuJesu. Ngibona umdlavuza ngasohlangothini lwesokunxele, phakathi ebeleni lakho, usajulile. Ngaphansi kwebele lakho, ngibona isifo somdlavuza sikhula." Eqhuba uXhali uthe kuseyiqhuzwana kodwa elisakhula.
"Yingakho uhlale uzwa ubuhlungu ngaphansi kwebele lakho langokwesokunxele. Kufufusa isifo somdlavuza. UJesu ukunikeza ithuba lokuba uphunyuke kunoxhaka wokufa, ngokuzinikela kuye. Sengiwenzile owami umsebenzi," kuphetha uXhali we-I Am Ministries.
Indodakazi endala kaConnie, ayithola emshadweni wakhe wokuqala, uLesedi Matsunyane-Ferguson, isole uXhali ngokuzifunela udumo ngezinhloso ezimbi ngegama lakwaFerguson. "Uma inhliziyo yakho imsulwa nobizo lwakho lufuna ube njalo. Bekufanele uthole enye indlela yokudlulisa nanoma yimuphi umyalezo ngqo.
"Umbhedo nje! Anginandaba nokuthi singosaziwayo abanenhlonipho nesizotha. Kuningi okufanele sisuke kukho njengoba kunjalo," kuphetha uLesedi, owayelingisa indawo kaDavina Moore kwiRhythm City.
UConnie uvele wathi umyalezo womfundisi umvusela iminjunju. Umyeni kaConnie, uShona (47) washonela esibhedlela iNetcare Milpark, eGoli ngoJulayi 30, nyakenye.
Sicasule abaningi isibonakaliso somfundisi maqede banxenxa uConnie ukuba ambophe lo mphrofethi abamsole ngokuba ngunontandakubukwa. Akukhona okokuqala kuba nomphrofethi osho isibonakaliso.
Nomphrofethi uRhadebe Lihle wabhala kwiTwitter ngo-Agasti 1, 2021 wathi waboniswa ngokushona kukaShona ngoMeyi 19.
"Ngesikhathi ngibona lokhu inhliziyo yami yaphatheka kabi ngoba konke engangikufuna kwakuwukuvika lokhu ngoMeyi 19, 2021. Ngiyaxolisa ukuthi angizamanga ngokwanele," kubhala uRhadebe. Waze wabhalela noConnie wathi "Connie Ferguson, umyeni wakho usengozini. Angifuni ukubukwa, uma bekunendlela engcono yokudlulisa lo myalezo bekuzoba ngcono ngiwudlulise ngasese," kuphetha uRhadebe.