UBOPHELE izilomo umdlalo okulindeleke ukuthi maduze nje, uvale isikhala seGomora, kuMzansi Magic. Lo mdlalo iMy Brothers Keeper, ubophele abalingisi okubalwa uWiseman Mncube, Sdumo Mtshali, Lindani Nkosi noZola Nombona.
UShirley Adonisi, onguMqondisi wezinhlelo zokungcebeleka kwaM-Net, uthe umdlalo uneziqephu eziwu-130, esokuqala sizokhonjiswa ngoMsombuluko ngo-Okthoba 23 ngo-19:30 kuMzansi Magic, 161.
Uthe umdlalo uphrojuswe iRhythm World, okuyithimba eliphrojusa umdlalo owundaba isegudwini, uMkhokha: The curse.
“Sihlale sibeka ababukeli phambili emidlalweni yethu. Njengoba kuza iMy Brother’s Keeper, siyakujabulela ukuletha umdlalo obhalwe ngobuciko futhi ozothokozisa ababukeli bethu beDStv Compact viewer. Imidlalo ewuchungechunge iyathandwa eNingizimu Afrika, siyakujabulela ukulokhu sinikeza ababukeli imidlalo emisha ezobajabulisa,” kuchaza u-Adonisi.
Echaza kabanzi ngendikimba yomdlalo uShirley, uthe ukhuluma ngomkhuba wesiZulu wokungena amakhosikazi. Uthe kunoNqubeko okuyindawo elingiswa nguWiseman, owephula imithetho elandelwa uma kuzongenwa unkosikazi womuntu. Yena ufuna ukungena ngenkani unkosikazi kamfowabo uFakazile, olingiswa nguZola okunguyena oyinhloko yomndeni wakwaShabalala.
Eqhuba uthe umdlalo weneka inkohlakalo nobugebengu. Ubophele abanye abalingisi abafike kwezwakala okubalwa uVuyiseka Cawe, Hlengiwe Lushaba-Madlala, Nkanyiso Mchunu, Sparky Xulu, Raphael Griffiths noNthabiseng Kgosana.