KULINDELEKE ukuthi ashubise izinto ebhizinisini iLegacy Investment, uLunga Shabalala, maduze ozoqala ukubonakala elingisa emdlalweni iLegacy.
Lo mdlalo ukhonjiswa njalo ngoMsombuluko kuya ngoLwesine ngo-7 ebusuku kwiM-Net (101).
Kuwona uzobe elingisa indawo kaSimz, uzofika eyindodana kaMsizi (Siyabonga Thwala), naye kulo mdlalo olwa indaba yesikhundla sokuphatha enkampanini iLegacy Investment.
Ngokwesitatimende esikhishwe abakwaM-Net, uSimz ungumfana ofunde ezikoleni zabamhlophe osezingeni lomtakabani emkhakheni wamabhizinisi akuwona.
“Okwamanje ngeke sande kakhulu ngokuthi indawo yakhe izohamba ibheke kuphi kodwa yena useyingxenye yalo mdlalo futhi uzoqala maduzane ukubonakala kuwona. Kodwa esingakusho nje ukuthi uma esehlangane noyise ebhizinisini iLegacy Investments, izinto zizoshuba kakhulu futhi kuningi okuzoshukumisa lo mdlalo njengoba indawo yakhe ithokozisa kakhulu futhi nathi singangabazi ukuthi abantu bazoyithokozela,” kuchaza isitatimende.
Isolezwe lizamile ukuxhumana noLunga kodwa ucingo lwakhe belwamukela imiyalezo kuphela.
Kodwa kwiTwitter ngeledlule, uLunga, ukuvezile ukuthi kukhona la ayoqala khona ukuqopha kodwa wanganda ngamaningi.
Abantu bakuleli nozakwabo akade elingisa nabo emdlalweni iThe River okukhona kubo uLawrence Maleka, bambongele ngokuba yingxenye yalo mdlalo.
ULunga uthola leli thuba nje kusanda kuphela indawo yakhe emdlaweni iThe River, la kade elingisa khona indawo kaLindani.