UKUHLALA etshelwa ukuthi akabukeki kahle futhi nomzimba wakhe awuhehi, akumvimbanga ukuthi afeze amaphupho akhe umlingisi waseBergville.
UNompumelelo Vilakazi (23), olingisa indawo kaSne kwiDiepCity edlala kwiMzansi Magic, uthi ukhulele esigodini saseMagangangozi, nokuyilapho afunda waqeda khona eWinterton, eBergville.
Kumanje uNompumelelo ungomunye wabalingisi abaphambili, kulo mdlalo ongene endaweni yeSibaya.
Engxoxweni neSolezwe le ntokazi idalule ukuthi ngenkathi iqeda umatric yafundela ubuthishela e-UKZN eThekwini, okuyilapho yafunda kabanzi ngomkhakha wokulingisa.
“Ngasekhaya kuneqembu elenza izinto ezihlukene emkhakheni wamaciko engaba yingxenye yalo, futhi lalihambela izindawo ezihlukene eBergville. Bengihlala ngitshelwa ukuthi angimuhle futhi nginomzimba omkhulu, lokhu kwenza ngizenyeze kakhulu ngangakhululeka ekwenzeni into engizithandayo. Ngaqeda isikole ngase ngiya kokwenza iziqu zobuthishela e-Edgewood, nokuyilapho ngabuyelwa ukuzethemba ngenxa yezinto engafike ngazithola khona, ezithinta ukulingisa yize ngingakufundelanga kodwa kuningi engakufunda khona,” kuchaza uNompumelelo.
Uthi esafunda ngemva kokubuyelwa ukuzethemba kwakhe, wangenela umncintiswano wozime wabantu abondlekile, nokuyinto eyamjabulisa.
“Ngabuyela ekhaya ngo-2019, ngaqala ngazama ukungena emkhakheni wokulingisa. Bengithumela ama-video ami ngilingisa ezinkampanini ezihlukene kuleli. UMandla N ngibone ngenkathi efuna abantu abazolingisa ku-Instagram, ngazama kodwa ngangaphumelela ngoba inetwork ibingihlupha emakhaya. Lelo thuba lagcina lingilahlekele. Kuthe sengingalindele lutho, uMandla wangibiza eGoli ngizokwenza inhlolokhono yalo mdlalo, okuyilapho ngashiya phansi nokufundisa eNtatakusa Secondary, la kwamina ngafunda khona,” kuchaza uNompumelelo.
Uveze ukuthi indawo kaSne njengoba abantu sebeyibonile, izoqhubeka nokukhombisa owesifazane obekezelela ukuhlukunyezwa yisoka lakhe.
“USne ngesikhathi uqala lo mdlalo ubeyisigebengu esikhululekile, kodwa manje usenovalo ngemuva kwesigameko esehlile kwaze kwakhona oboshwayo. Okunye ngaye wukuthi uhlalele ubudlelwane lapho ahlukunyezwa khona kodwa ngeke aye ndawo ngoba uthola uthando esokeni lakhe, nokuyinto akhule engayazi. Ubudlelwane bakhe nesoka buzogqama kanti abantu bangalindela nokunye okukhulu kulo mdlalo,” kuchaza intokazi yaseBergville.
Lo mlingisi uveze nokuthi ubusisekile empilweni ngokuthola indawo ephambili emdlalweni omkhulu kangaka, ekubeni uyaqala ukulingisa emdlalweni wethelevishini.