INTOKAZI edume ngokubonakala kwiReal Housewives of Durban nakwi-Our Perfect Wedding, uNonkanyiso ‘Laconco’ Conco, ubonge abantu abakhuluma kabi ngaye wathi bayamkhuthaza.
ULaconco usho kanje emuva kokunyelwa yinyoni esandleni njengoba ezokwethula uhlelo olusha, iForever Thina ngo-7 ebusuku, kuMzansi Magic.
"Labo bantu abangikhuluma kabi, bayangiqinisa mina. Isisekelo sempilo yami siyaqina futhi uMdali usazonikhombisa ukuthi ngingowakhe,“ kusho uLaconco.
Izindaba zokuqashwa kukaLaconco ohlelweni, zidalulwe nguye kwiFacebook maqede wavezela umphakathi okuzobe kwenzeka kulona.
Isolezwe Ngempelasonto lithole ukuthi uLaconco uthathe izintambo kuLebogang ‘Funny Chef’ Tlokana, obethula iForever Thina yangesizini eyedlule.
"ISonto ntambama lizobe limnandi. Ngiyabonga kwi-Urban Brew Studio, nakuMzansi Magic ngokungethemba nokuxhumana nemindeni nezindaba zayo. Nawo wonke umuntu osemkhakheni wezobuchwepheshe engisebenze naye kanti okungijabulise kakhulu yilapho begqokela khona.
"Bengithanda ubudlelwano esinabo futhi uMzansi usazobubona. Nezithandani ezisibhalelayo ngiyethemba ukuthi uhlelo luzisizile futhi zijabule kakhulu," kuqhuba uLaconco.
Uthe iForever Thina izoqala ukukhonjiswa kusukela ngoSepthemba 25.
ULaconco, oneziqu zobuntatheli azithola eRosebank College, uke wasebenza kwiVuma 103 FM futhi akamusha ekwethuleni uhlelo lwethelevishini, njengoba eke wethula iNgane Yami.
Ungunina wengane yowayengumengameli wakuleli, uMnuz Jacob Zuma.