UMLINGISI weHostela, uLungelo Mpangase, uthuse abantu abaningi edalula ukuthi ukusongelwa ngokufa kumgqugquzele ukuba azithengele umuzi.
ULungelo unameke isithombe ephethe izikhiye ku-Instagram maqede wabhala ukuthi ngezomuzi wakhe wokuqala.
"Ukube bengingatholi izinsongo zokubulawa, ngilandelwa futhi ngithola imiyalezo esabisayo ekuqaleni kwalo nyaka, ngabe namanje ngisakhokhela umqasho obunenkinga yamanzi," kubhala le ntokazi eqale ukuduma ngokulingisa indawo kaKhethiwe kwiHostela. Isolezwe NgoMgqibelo lizamile ukuthola ukuphawula kukaLungelo kodwa wathi akakhulumi nabezindaba.
Lo muzi ulandela unyanyavu lweBMW aluthenga ngonyaka owedlule usuyophela. Nakhona waveza isithombe sakhe emi phambi kwemoto maqede wabhala ukuthi uke wathwala kanzima engakabi nemoto ngenxa yezingqinamba abehlangabezana nazo.
Enye yazo kwakuba ukungabi nemali yetekisi uma kufanele aye kwinhlolokhono.
"Ukubanjwa inkunzi kuBarry Hertzog Avenue maqede ngasala dengwane, ngaphoqeleka ukulubhada ngonyawo ngiya eNoord futhi ngihamba ngicela abashayeli bamatekisi ukuba bangigibelise bhusende." Wathi wayebuye afike sekwedlule isikhathi emsebenzini ngenxa yokuthi amatekisi eVosloorus ayeqala ukusebenza ngezithuba zabo-4.30 ekuseni, okuyisikhathi ayeqala ngaso ukusebenza.
"Ngesikhathi ngiphuka umgogodla engozini yetekisi, kwafanele ngifunde ukuhamba ngezinyawo. Bengiqhubeka nempilo kodwa ngifunda ukuthi kunobuhlakani emzabalazweni. Umama wathi kimi, 'iva likhishwa ngelinye.' Nami ngenza kanjalo. Nginethemba ukuthi lokhu kuzokhuthaza umntwana osemncane, onamaphupho emakhaya ukuthi uthi ungenalutho kodwa uphumelele ngoNkulunkulu," kwakubhala uLungelo oselingisa indawo kaPoppy Tshabalala emdlalweni wethelevishini othi Lingashoni.
Empeleni uLungelo waqala ukulingisa emdlalweni owawuzosakazwa kuSABC 1, osihloko sithi Uselwa ngo-2007, kodwa wagcina ungalibonanga ilanga ngenxa yezinkinga ezaqubuka. Wabe esevelela kwiHostela nakuba indawo ayeyilingisa yabulawa ngesizini yokuqala. Wabe eselandelisa ngefilimu emfishane eyayisakazwa kuMzansi Magic ethi Themba Lami ngaphambi kokuba nguNtokozo emdlalweni othi Mzali Wami.