OBENGUMLINGISI weDurban Gen, uNyaniso Dzedze, ugonyulukile wachaza ngobuhlungu abuzwa ngesikhathi elingisa indawo kaDkt Dhlomo.
Kuzokhumbuleka ukuthi uDkt Dhlomo ugcine ebulawe ngumkakhe, uSne (olingiswa nguNombulelo Mhlongo), emuva kokumhlukumeza kaningi kwahluleka ngisho esembophisile kodwa kwanhlanga zimuka nomoya.
Ekhuluma kwividiyo uNyaniso (36), uthe bekungelula ukudlala indawo yomuntu wesilisa ohlukumeza owesifazane ngoba imvusela iminjunju.
Umlingisi uphawule kanje: "Sesiya ngasekugcineni, bese kunzima ngempela kimi ngoba le ndaba iyangithinta kakhulu. Ngiqale ngangayiqonda ekuqaleni. Iqale ukucaca bha ngesikhathi sengifunda isiqephu. Yilapho ngibone khona ukuthi iwumfanekiso yalobu bunzima umama adlule kubo ngenxa kababa."
UNyaniso ufanise uDkt Dhlomo noyise, empilweni kanina. "Bekunzima kimi. Ngiyakhumbula ngolunye usuku ngithinta umphathi wami ekugcineni, ngikhala mi! Izinyembezi. Ngangifuna ukushiya ngoba kwase kunzima ukubhekana nengxenye yobuhlungu bami. Ingxenye yempilo yami engingakaze nganinga ngayo."
UNyaniso uthe yizinto eziba yinselelo nakwabanye abalingisi uma bebhekene nendawo efana ncamashi nempilo yangempela. "Bekuwumqansa ngempela kimi."
UNyaniso ubonge ozakwabo ngeqhaza abalibambile ukuze indawo ayilingise ngezinga eliphezulu. UNyaniso ubuya kwi-Ashes To Ashes, unamava ekulingiseni futhi uke wasebenza nomculi odumile emhlabeni uBeyonce. Le nsizwa beyilingisa indawo kaSimba efilimini iBlack Is King, ibiboshelwe noMary Twala ongasekho, Nandi Madida noMoonchild.