ABABUKELI boMzansi Magic bazothola ithuba lokufunda ngobungoma ohlelweni oluveza impilo yangempela yezangoma ezimbili ezaziwa ezinkundleni zokuxhumana, uPrudence “Ngwe” Magagula noMakgotso “Gogo Maweni” Makopo.
Uhlelo Izangoma Zodumo luzoqala ngoLwesithathu oluzayo ngo-8 ebusuku.
Ngaphandle kokuba yisangoma uNgwe (24) ungumhlengikazi onengane eyodwa.
UMakgotso (34), ozibiza ngoChampagne Mommy ku-Instagram, ungumhleli wemicimbi onezingane ezintathu.
Ku-Instagram uMakgotso unenqwaba yabalandeli emakhasini akhe ahlukene okungeliveza impilo yakhe yansuku zonke, elithinta umsebenzi wobungoma lapho eveza khona ethwasisa enezinyoka zakhe nokunye, nelesitolo sakhe esidayisa amakhambi esintu.
Uhlelo luzobe luveza impilo yabo yansukuzonke kusuka besemsebenzini wobungoma, “nowakwamlungu” noma benemindeni yabo.
UNomsa Philiso wakwaM-Net, uthe ababukeli bazobona ukuthi abesifazane abasebenzayo bamelana kanjani nobizo lobungoma nokuthi bakusheba kanjani kokubili.
“Yize luzoheha ababukeli abancane kodwa nabadala bazoluthokozela. Ababukeli mabalindele ukubona ukuxoxwa kwendaba kukwelinye izinga lapho ubizo luhlangana khona nempilo yansukuzonke yababili esikhuluma ngabo.”