IZINSIZWA ebezizifela ngomlingisi wodumo kuMuvhango nakwiMbewu, uBuhle Samuels, zicikekile ngesikhathi edalula ukuthi usenomntwana. Okushaqise abantu wukuthi akukaze kwabikwa ukuthi uBuhle ukhulelwe. UBuhle, obenguMatshidiso Mofokeng kuMuvhango ngaphambi kokuba nguZandile kwiMbewu, umemezele kwi-Instagram kuleli sonto ukuthi ubusiswe ngomntwana wentombazane.
"Uyamukelwa emhlabeni ngilosi encane. Uyathandwa EESS Inhliziyo iyehluleka ukwamukela. Ngijabule kakhulu. Umhla ka-12/12/22 ngeke uphinde ufane nakuqala," kuchaza le ntokazi ebuye yalingisa emdlalweni othi Kings of Jo'burg ngo-2020 nakwi-One Night KwaMxolisi Cardi ngo-2021. Izinsizwa ebezingabalandeli bakhe zihluleke wukuzibamba zikhombisa intukuthelo. Yize abanye bebemhalalisela kodwa iningi livele lamgcona ngokuthi ushade nesigebengu. Lithe akukho elingamhalalisela ngakho ngoba umyeni wakhe yisigebengu. Bebethi akaveze ingane ayibelethile noyise wayo.
Kwenzeka lokhu nje uBuhle uke wanyamalala emehlweni abantu selokhu ashada isinyenyela nendoda ebizwa ngoThando Songishe, ngoMashi 2022. Ngokusho kwemithombo yezindaba, uBuhle ushade nomlisa okungaqondakali ukuthi uziphilisa ngani, kangangoba emshadweni wabo kwakungavunyelwe izimenywa ukuba zithwebule izithombe futhi umkhwenyana wayegadwe ngezinhlokohlela zezibhamu. Onogada babeqinisekisa ukuthi uyawukhomba umuzi onotshwala othwebula okwenzeka emshadweni.