SELUMENYEZELWE usuku okuzoqala ngalo isiteshi sethelevishini esisha esizobe sigadla ngezinhlelo ezahlukene zase-Afrika, iHONEY ezotholakala kuDStv (173), kusukela ngoFebhuwari 15.
Kulesi siteshi kuzobonakala izinhlelo ezintathu zakuleli uma siqala okukhona kuzona oluthi Pastors Wives, Shine Shine neThe Buzz.
Ohlelweni iPastors Wives kuzobonakala amakhosikazi abefundisi bamabandla amakhulu kuleli ekhombisa ngempilo yawo yansuku zonke.
Lolu hlelo lusungulwe intokazi engumlingisi uSonia Mbele, owasungula iThe Realhousewives of Joburg.
UYolisa Phahle ongumphathi wakwaMultichoice,uveze ukuthi, izinhlelo abazibophele kulesi siteshi zizogqamisa ithalente izwe i-Afrika elinalo.
“Ohlelweni iPastors Wives sizobona ukuthi abesifazane abayeni babo abangabefundisi bamabandla adumile, bamelana kanjani nokuphatha ibandla nemindeni yabo. Kulolu hlelo ngeke nje kugqame okuhle kuphela kodwa kuzobonakala nezimpi phakathi kwala makhosikazi. Okunye ngalo wukuthi ngeke kubonakale amakhosikazi abefundisi bakuleli kuphela kodwa nawakwamanye amazwe ase-Afrika,” kusho uYolisa.
Uthe abanye besifazane abazobonakala ezinhlelweni ezihlukene kukhona uPearl Umeh waseNigeria, Patricia Kihoro noFoi Wambui baseKenya, Anele Mdoda, Mbali Nkosi no-Anele Zondo bakuleli.
“UMbali uzokwethula uhlelo oluthi Shine Shine, oluzogxila ekusizeni abantu abafuna ukushintsha indlela ababukeka ngayo. U-Anele Mdoda uzokwethula uhlelo oluthi The buzz, okuwuhlelo oluyinkulumo ngxoxo, la ezokhuluma khona nabesifazane basemazweni ahlukene ngezinto ezithinta isiko, ezothando, ezempilo abangani nemindeni,”’ kuchaza uYolisa.
Uthe kulesi siteshi okubajabulisa kakhulu wukuthi sizoveza izinhlobo ezihlukene zamasiko nendlela okuphilwa ngayo emazweni ase-Afrika.
NjengeDStv uthe bayathemba ukuthi bazoqhubeka nokuletha izinhlelo ezenza baziqhenye ngendlela abaphila ngayo abantu base-Afrika.
Lesi siteshi uthe sizotholakala kuleli eNigeria, eGhana, Kenya, e-Uganda, Namibia, Botswana, Malawi, Zambia, Angola,Mozambique, eTanzania, DRC naseCameroon.
Sona kuDStv uthe, sizotholakala kuCompact, Compact Plus nePremium.