UMLINGISI womdlalo omusha kwiMzansi Magic, Umkhokha, uthi yize ingakagqami indawo ayilingisayo kodwa kusazoshuba.
Usho kanje uKwezi Ndlovu, odlala indawo kaNobuntu emdlalweni wethelevishini, Umkhokha. Ungomunye wabalingisi abaphambili kulo mdlalo okubalwa uDeli Malinga, Sthandiwe Kgoroge, Nay Maps, Linda Sokhulu noSibonile Ngubane.
Uthe yize engeke adalule yonke imininingwane ngendawo ayidlalayo kodwa kuningi okusazojabulisa abantu ngayo.
“ Iyindawo enginika inselelo futhi akuyona indlela engiphila ngayo le engiyilingisayo. Zikhona izinto engifana ngazo noNobuntu njengokuhlonipha nokungasabi ukuveza engingakuthandi. Okuningi kuhlukile empilweni yami yangempela njengoba ngingumuntu okhululekile uma ngiziqhathanisa noNobuntu,” kuchaza uKwezi.
Lo mlingisi uthe usengene nasemabhizinisini futhi uvule inkampani iMilani Construction (Pty) Ltd. Uthe akafuni ukuma ngomsebenzi owodwa ngoba akafuni ukuphinde azithole eswele njengakudala.
UKwezi uqale ukuvela elingisa indawo kaVivian kwiSithembiso, wadlala ekaPretty Girl kwiSibaya, Thuli Ngubane kwiHousekeepers isizini yesibili, Stellina kwiRockville nekaMaMngadi kwiThe Herd.
Uthe njengoba eseneminyaka emihlanu elingisa usafuna ukuthuthuka kule ndima ngokuthi angene kwezokuphrojusa imidlalo yethelevishini namafilimu. Ufuna nokuba ngumsakazi futhi angakuthokozela ngisho ukusebenzela isiteshi somphakathi ngoba ufuna ukufunda kabanzi ngezokusakaza.
