Umlingisi omusha weThe River, uTumi Masemola, uswele umgodi wokucasha ngephutha alenzile lokubulala uzakwabo, uCandy Tsamandebele Mokwena.
UTumi usethe uyaxolisa kakhulu ngaleli phutha alenzile.
"Ngiphoxeke ngempela futhi ngifisa ukuba kuvuleke umgodi. Ngixoleleni ngokufaka isithombe okungesona.
UCandy Tsamandebele uphila saka," kusho uTumi odume eqenjini lomculo iGang of Instrumentals futhi obelingisa emdlalweni wamahlaya othi City Ses'la.
UTumi ubethi ubhonga emswanini ngokudlula emhlabeni kwabantu besifazane abasendimeni yezokungcebeleka.
Ekhasini lakhe likaTwitter ube esefaka isithombe sikaMary Twala, umvumbululi wamakhono uMoonyeen Lee nesishoshovu somzabalazo.
UTumi uyilahle ngokufaka isithombe sikaCandy Tsamandebele ekubeni yena esadla anhlamvana. Empeleni uTumi ubeqonde ukulilela ukuhamba emhlabeni kukaCandy Moloi obenguVho-Makhadzi kuMuvhango.
Abalandeli abaningi bakaCandy Tsamandebele bashaqekile ngalezi zindaba. Kuphoqelekile ukuba uCandy Tsamandebele ukuba naye angene kwelakhe ikhasi le-Instagram acacise ukuthi yena usaphila saka. "Ngisekhona, ngiyaphila futhi ngiwumqemane. Ngiyaphila," kusho uCandy Tsamandebele.