UTHOLE ithuba eliyivela kancane uDumisane Buthelezi, odume ngelikaDJ Asiye Wabantu (34), kwezomculo.
UDJ Asiye Wabantu waseMphondi, eNquthu, uzokwethula uhlelo lomculo wesintu kuthelevishini esiteshini iChannel 135 Open View.
Uthi lolu hlelo olubizwa nge-Ezakwantu, luzoqala kuNdasa 5, (Ephreli). “Luzodlala ngemiGqibelo kusukela ngo-9 ekuseni kuze kushaye u-12 emini bebade.”
UDJ Asiye Wabantu akasiyo neze imfundamakhwela kulo mkhakha, ubuye ethule uhlelo lomculo kamaskandi. Ungumsakazi weCosmo FM, okuyisiteshi somphakathi enyakatho yeGoli.
Umethuli wezinhlelo uthe sebeqalile ukuqopha ezinye iziqephu zohlelo. Wathi uzoliphathisa okwezikhali zamaNtungwa ithuba alinikeziwe ngoba kade ayelilangazelela.
“Ngizimisele ukuwuthuthukisa ngayo yonke indlela umculo wesintu, ukuze nawo ube sebalazweni lomhlaba ngoba wumculo onganakekile futhi obukeleka phansi,” kuphetha uDJ Asiye Wabantu.