OBENGUMETHULI wohlelo lwemishado i-Our Perfect Wedding, usejoyine umdlalo okhonjiswa kuChannel 129, kwiBET, iSono kusukela ngoMsombuluko kuya kuLwesihlanu.
Lezi zindaba zivezwe ngabe-BET abaqinisekise ukuthi uKayise Ngqula, uzodlala indawo kaNeliswa ofuna ingane azoyikhulisa nomyeni wakhe, eHouse of Grace.
UKayise ohluleke wukuzibamba ngenxa yenjabulo unameke isithombe sakhe ebesiveza ukuthi usejoyine lo mdlalo.
Esithombeni ku-Instagram, uthe ujabule ngokuthola ithuba lokulingisa kulo mdlalo.
“Ngikujabulele kakhulu ukuvuleka kwamathuba empilweni yami. Ngizibona ngisayibambe kahle impela, ikakhulukazi njengoba ngiqale ngingelutho kulo mkhakha. UNkulunkulu ungibeke phambili kuzo zonke izinto azenzela abantwana bakhe," kubhala yena.
Kubukeka lo mdlalo wandisa isibalo sabadlali kulo nyaka njengoba usanda kujoyinwa nguMayuri Naidu, odlala indawo kaDr Fahmieda Rasdien ongudokotela wasejele ozifelayo ngomsebenzi wakhe.
Omunye umlingisi omusha kwiSono nguSobantu Nqayi, odlala indawo kaNceba ogxile kwezepolitiki.