ITHEZE obengumlingisi woZalo, ifilimu entsha eshuthelwa KwaZulu-Natal, Imali Emnyama ehlanganise abalingisi abaziwayo nabasafufusa.
UPhumzile Mlangeni obedlala indawo kaFihliwe kuZalo, kuSABC1, uthole indawo ebalulekile kule filimu eqale ukushuthwa ngeledlule.
Udlala indawo kaKhanyisile ongudadewabo kaSbongiseni (Ndumiso Dlamini). Uthe kumjabulisile ukuthi aphinde ahlangane nabalingisi abadala ayelingisa nabo kwiFamily Bonds.
“ Kufana nokuthi ngibuyele ekhaya ngokulingisa nabantu engangilingisa nabo kwiFamily Bonds njengoNdumiso Dlamini. SisekwiFamily Bonds ngangiwumkakhe kodwa manje sengiwudadewabo. Thina singabalingisi bokuqala abavezwa yiZero to Hero Casting Agency ngokusifaka kwiFamily Bonds,” kusho uPhumzile.
Uthe indawo yakhe ingenye yezigqamile kule filimu njengoba elwa noNdumiso Dlamini ongumfowabo ngokwefilimu.
“Kule filimu asibhekani noSbongiseni yize engumfowethu. Inkinga idalwa wukuthi uphila kahle ngenxa yokuthwala ngobaba kanti mina ngiyahlupheka. Ngihlala ekhaya nomfowethu omncane sidla imbuya ngothi, kanti umfowethu uphila kahle kodwa akasinakile. Lokho kwenza sixabane kakhulu ngoba nomnotho wakhe uwuthole ngokuthwala ngobaba,” usho kanje.
UPhumzile uthola le ndawo nje useke walingisa emidlalweni eminingi yethelevishini emva kokuvela kwakhe kwiFamily Bonds lapho aqala khona ukwaziwa.
Useke walingisa kwiBoo & TT , eHostela, eKasi: Our Stories, Generations, Isidingo, Isithembiso, Judge Thenjiwe Khambule, Scandal!, Sokhulu & Partners nakuZalo.
UPhumzile uthe abantu abalindele into yamehlo futhi bazoyijabulela indlela eyiyona.
UPHUMZILE Mlangeni olingisa kwifilimu entsha yaseNingizimu Afrika eshuthelwe eThekwini
Isithombe: INSTAGRAM