INTOKAZI ezakhele igama ekwethuleni izinhlelo zobumnandi uShamiso no-Uncle Vinny, bamenyezelwe njengabethuli abazobonakala eziteshini ezehlukene zakwaViacomCBS Networks Africa, bethula izinhlelo.
Bobabili bakhethwe ngaphansi kohlelo olwenziwa yile nkampani ukuthuthukisa amakhono entsha yakuleli efuna ukungena kwithelevishini olwaziwa ngokuthi iVJ Search.
AbakwaViacomCBS, ngalolu hlelo sebekhiqize osaziwayo okukhona kubona uNomuzi Mabena, Sizwe Dhlomo, Kim Jayde, Fikile “Fiks“ Moeti, Tshego Koke nabanye.
Laba babonakala ezinhlelweni ezehlukene ezisakazwa eziteshini okukhona kuzo iMTV, MTV Base neBET Africa.
Ekhuluma ngokuthola ithuba elifana naleli uShamiso, uthe noma yimuphi umethuli wezinhlelo oqala kwezinye iziteshi uba nesifiso sokuthi ngelinye ilanga abonakale kwiMTV Base.
“Ithuba elikhulu leli elivulekile kimina, ngijabule kakhulu njengoba nami ngisazifikela kulo mkhakha wokwethula izinhlelo. Ngakho ukuzibona sengilana manje kuwumuzwa omnandi ojabulisayo ngempela. Abantu esengihlangane nabo nasebesebenze kulezi ziteshi, bonke banobuntu futhi bazimisele ngokusicathulisa lapho kudingeka khona, ngakho ngiyezwa ukuthi kuzohamba isikhathi ngenze kahle kulo mkhakha engikuwona,” kusho uShamiso.
U-Uncle Vinny oke wabonakala ekhuluma ngomculo ezinhlelweni okukhona kuzo iMTV Base Hottest MCs New Wave List, uveze ukuthi kuyamjabulisa ukujoyina umndeni wakwaViacomCBS Networks Africa.
“Lona umsebenzi wami omkhulu wokwethula izinhlelo engake ngawuthola kuleli. Ngithukile ngeke ngiqambe amanga kodwa wonke umuntu usamukele ngezandla ezifudumele futhi bayasicathulisa lapho kudingeka khona. Okumele ngizame ukukujwayela nje ukuvuka ekuseni, futhi engikufisayo ukuthi ngelinye ilanga ngibe nohlelo lwami futhi kuvuleke namathuba phesheya kwezilwandle,” kuchaza u-Uncle Vinny.
UMonde Twala wakwaViacomCBS, uveze ukuthi babamukela ngezandla zombili emndenini wabo futhi bayathemba ukuthi bazokwenza kahle njengoba bona besaqhubeka nokusiza intsha efuna ukungena emkhakheni wethelevishini.