Nokubongwa Phenyane
IKHUZA ibuya emkhakheni wokulingisa intokazi yaKwaZulu-Natal, eke yabonakala emidlalweni eyahlukene kuleli, uXoli Zondi, oganele kwaZamisa.
UXoli ngemva kokushada wathola umntwana wanyamalala emkhakheni wethelevishini.
Ngesonto elizayo le ntokazi izoqala ukulingisa emdlalweni Imbewu, okuwudlalo okhonjiswa phakathi nezinsuku ku-e.tv ngo-9.30 ebusuku.
Ngokwesitatimende esithunyelelwe abezindaba, uXoli ungomunye wabalingisi abafike emndenini wakwa-e.tv njengoba kuyinyanga lesi siteshi esaqalwa ngayo.
“UXoli uzobe elingisa indawo kaViolet Vilakazi, okuyinkosikazi kaMenzi Vilakazi (Muzi Mthabela), okuyimanje emdlalweni usothandweni oluvutha amalangabi noMaZulu. UViolet ufika kulo mdlalo ngemva kokuthi isitha esikhulu sikaMenzi, uPhakade ephenye ngempilo kaMenzi nokuthi umndeni wakhe ukuphi. Umka Menzi abangasaxhumani naye, unenkinga njengoba egula ngengqondo,” kuchaza isitatimende.
Kulo mdlalo uzoqala ukubonakala esesibhedlela sezinhlanya nalapho uMenzi acela khona inkantolo ukuthi imfake kulesi sikhungo ngenxa yokungaphili kwakhe.
“Ukugula kwakhe ngekhanda kwaholela ekutheni athweswe icala lokubulala ngemva kokuthi eshise umuzi wowesifazane ayemsola ngokulala nomyeni wakhe.
Njengoba uMaZulu ebhekene nesimo esinzima sokuzondwa wumndeni ngemva kokuthenjiswa umshado wuMenzi, ingabe uViolet uzoba yisixazululo somndeni wakwaBhengu?
Ingabe uMenzi uzokwenzenjani uma sekuvela iqiniso ngenkosikazi yakhe njengoba manje esethembise omunye wesifazane umshado?” kuphetha isitatimende.