KUZOPHELA ukwazana phakathi kwabalingisi beThe Wife njengoba kuqhathwe u-Abdul Khoza onguNqobizotha Zulu, noBonko Khoza odlala indawo kaMqhele Zulu, kumunxa weBest Favourite Actor, kumaDStv Mzansi Viewers Choice Awards 2022
UBonko uvele wajabula ngesikhathi ezwa izindaba, wabhala kwiTwitter ukuthi akakaze nje waziphupha eqokwa kulo mqhudelwano.
"Ngiyabonga kakhulu Mzansi, nakuwe Stained Glass TV, nakwiShowmax Online," kuphawula uBonko olingisa kwiThe Wife.
Kanti ubongile no-Abdul, ngemva kokuzwa ukuthi uqokiwe emncintiswaneni. Yize zombili izinsizwa ziyizintandokazi ngenxa yeqhaza lazo kodwa zizobe zitibilisana noVusi Kunene onguFunani kwiHouse of Zwide, uZolisa Xaluva onguMelusi Dlamini kwiGomora noThapelo Sebogodi onguKhabazela kwiThe River.
Omunye umunxa ozobhekwa kakhulu ngowefavourite actress, okuqhudelana kuwo uSannah Mchunu onguZodwa kwiGomora, uThembi Seete onguGladys kwiGomora, uShoki Mmola onguCelia Kunutu kwiSkeem Saam, uDeli Malinga onguMaMzobe kuMkhokha noZikhona Sodlaka onguMandisa kwiThe Wife.
UKhozi FM lumelwe numsakazi wohlelo lwantambama, uSelby "Selbeyonce" Mkhize, oqhathwe noThomas Msengana & Skhumba Hlophe beKaya FM, uLerato Kganyago weMetro FM, uThando Thabethe we-947 noSphectacular & DJ Naves beMetro FM. Emkhakheni wefavourite rising star kutholene phezulu uKwenzo Ngcobo onguQhawe Zulu kwiThe Wife, umlingisi woZalo uHope Mbhele, umculi wama-piano uYoung Stunna, uDaliwonga no-Uncle Vinny. Kowefavourite comedian kuzodlana imilala phakathi kukaCeleste Ntuli, Skhumba Hlophe, uMpho Popps, Nina Hastie noMashabela. ULawrence Maleka uqhathwe noThuso Motaung, Motshidisi Mohono, Leanne Manas noThembekile Mrototo kwifavourite TV presenter.
Emunxeni wengoma eyintandokazi kuqhathwe ekaZakes Bantwini& Kasongo ethi Osama, ekaBig Zulu ethi Imali Eningi, ekaMakhadzi ethi Ghanama, ekaYoung Stunna ethi Adiwele nekaKabza&Maphorisa ethi Asibe Happy. Emkhakheni wabaculi abavelele kuboshelwe uMakhadzi, Hle, Zakes Bantwini, Big Zulu neScorpion Kings (Kabza De Small& Maphorisa).
Phakathi koDJ abazoshudulisana kubalwa uDBN Gogo, Scorpion Kings, Major League DJz, De Mthuda noDJ Shimza. Kwezemidlalo kuqhathwe uBenni McCarthy, Temba Bavuma, Pitso Mosimane, Ntando Mahlangu noRassie Erasmus. Naseqoqweni lefavourite personality kushubile njengoba kuncintisana uConnie Ferguson onguHarriet Khoza kwiThe Queen, uShauwn Mkhize odume ngelikaMaMkhize, uDBN Gogo noLasizwe Dambuza. Abadle umhlanganiso bayomenyezelwa kwiMzansi Magic (161) ngoJuni 25, kanti ukuvotela abaqokiwe kuvalwa ngoJuni 11.
Ukuvota ungena ku-www.mzansimagic.tv/dstvmvca noma ngeMyDStv App. Abavote babadlula bonke bazozihlomulela ngezimoto ezintathu zohlobo lweKIA.