UMSUNGULI wohlelo iLockdown House Party, oludlala esiteshini somculo iChannel O, uDJ Shimza uthi bazonikeza abanye oDJ abasafufusa ithuba. Lokhu kwenzeka ngemuva kokuthola uxhaso lweHollywood Bets kusukela esiqeshini sangempelasonto edlule kanti, isivumelwano ngesamasonto angu-10. Lolu hlelo ludlala ngoLwesihlanu nangoMgqibelo kusukela ngo-6 kuya ku-12 ebusuku.
"Ukuba iHollywood Bets ayibanga yingxenye yeLockdown House Party, besingeke sikwazi ukunyusa isibalo samaciko esiwaqashayo nokunikeza inkundla abaculi noDJ abasafufusa ukuze badume. Ababukeli bakwazi nokubona amaciko nobuciko bawo bese beyaweseka," kusho uShimza.
Lolu hlelo luqale ngonyaka odlule emuva kokuthi kube nomvalelandlini ngenxa yokuzama ukunqanda ukubhebhetheka kweCovid-19. Kuthe uma imithetho isithanjiswa lwaphela njengoba seluphinde lwabuya nje kule nyanga ngenxa yokubuyiselwa kwezwe esigabeni sesithathu.
USandisiwe Bhengu okhulumela iHollywood Bets, uthe bayawubona umsebenzi omuhle weLockdown House Party wokudala amathuba omsebenzi nokuqhakambisa amaciko asafufusa.
"Ubuciko bubalulekile ezweni yingakho siwuHollywood Bets sizimisele ngokusiza kulo mkhakha. ILockdown House Party isisivulele ithuba lokukwazi ukuxhumana nabanye abasemkhakheni wezobuciko futhi sibheka ezinye izindlela zokufaka isandla ekuthuthukiseni ubuciko baseNingizimu Afrika."