OSAZIWAYO okukhona kubona uZodwa Wabantu, DJ Lady Du, Lasizwe, Nota Baloyi, Sol Phenduka, Innocentia Morolong noDineo Ranaka, bazokhuluma ngezihloko ezihlukene uma sekuqala uhlelo olusha kuSABC1.
Uhlelo lwezinkulumo ngxoxo oluthi Heavy Hitters luzoqala ngoMgqibelo kuSABC1, ngo7.30, ebusuku.
Kulona abethuli balo uNaked DJ noKamo Moth bazokhuluma ngezihloko ezijulile, kodwa zobumnandi okukhona kuzona ezokuthi bafike kanjani lapho bekhona kulo mkhakha wezobumandi.
Bechaza ngalolu hlelo abakaSABC1, baveze ukuthi uhlelo olungadingi abantu abazogxeka uma kukhona izihloko ezivelayo njengoba bezokhuluma nganoma yini.
"Uhlelo olumnandi kakhulu lolu oluzobheka izinto ezihlukile umuntu asezenzile kulo mkhakha akuwona. Lapha nalaphaya kuzovela izihloko ezikhuluma ngezinto ezijulile kancane hhayi kakhulu ngakho abantu bangazitholi sebexakeka uma kuza kulolu hlelo. Uhlelo intsha ezolujabulela kakhulu njengoba luzobe luqukethe abantu abasafuna ukwazi ngabo kabanzi kanye nemikhakha abakuyoba,“ kuchaza isitatimende.
Abanye abazokhuluma nabo yize bedumile kodwa abakaziwa kahle ukuthi baphuma kuphi.
“Isiqephu ngasinye sizoqala ngokuthi kwaziwe kabanzi ngosaziwayo ngaphambi kokuthi badlale imidlalo eyahluke. Siyathemba ukuthi abantu bazoluthakasela lolu hlelo kuze kube sekupheleni njengoba kungenye yezindlela zethu zokujabulisa ababukeli balesi siteshi,” kuphetha isitatimende.