YIZE kade kwagcina ukuthi kube nomshado ezinhlelweni zethelevishini kodwa oweGomora edlala kuMzansi Magic ngo-19.30 uthandelwe ukusetshenziswa kombala omnyama nongajwayelekile ukugqokwa emishadweni.
Amalungiselelo omshado abeshisa bhe. Kukhona nongoma uyayona abebengafuni ukuthi uphumelele. Indodakazi kaThati, uBuhle (odlalwa u-AmaQamata) ubengafuni ukuthi unina ashade noyise omncane.
Kuthe kusabhekwe isikhwele sikaBuhle, nangu noMalusi (Zoliswa Xaluva) obengazazi ukuthi kumele enzenjani ukumisa lo mshado wesinqandamathe sakhe sakudala.
Ababukeli bohlelo bakuthakasele okwenzeka kuleli sonto, abaningi bebebambe umoya ngokuthi uMalusi angahle awumise ngempela umshado.
Okunye okujabulise abantu uMzozozo noBongani nokuyibona abaletha amahlaya amnandi nakulokhu abaphoxanga.
Umsebenzi wokuhlobisa lo mcimbi wenziwe yinkampani ezinze eGoli nesetshenziswa osaziwayo abaningi uma befuna ubukhazikhazi obusezingeni eliphezulu, iNono Events.
Le nkampani ibhale ku-Instagram ibonga ukunikwa ithuba lokuba yingxenye yohlelo.
