UMLINGISI oqokwe kuma-16th South African Film and Television Awards, uthi kumenza afikelwe wukuzehlisa ukuqhudelana nezinkakha abanga nazo isicoco.
UThobani Nzuza (29) uqokwe emkhakheni weBest Actor noPallance Dladla, Dumisani Dlamini, Hamilton Dlamini noBrendon Daniels.
Uqokelwe indawo kaMndeni abeyilingisa ngesizini yokuqala neyesibili emdlalweni okhonjiswa kuMzansi Magic (161), iHostela.
Ekhuluma neSolezwe ngeSonto, uthe ujabule ngokuba sohlwini lwabalingisi abangaconsi phansi emcimbini wokuhlonipha amaciko.
"Ngikujabulele kakhulu ukuzibona ngiqhathwe nezingqungqulu. Nginalo futhi ithemba lokuthi ngizobuya nayo indondo," kusho uThobani.
Eqhuba uthe yize sekuphele izinyanga ezine ehlezi ekhaya kodwa umatasa nokubhala umdlalo weshashalazi.
Uthe okwamanje ngeke anabe ngawo njengoba esematasa nezinhlelo.
UThobani uke wabonakala emdlalweni okhonjiswa kwi- e.tv iThe Black Door.
Ulingisa indawo kaSmanga kwiDiepCity.
Phakathi kweminye imidlalo abonakale kuyo kubalwa Isipho noZalo olukhonjiswa kwiSABC 1 ngoMsombuluko kuya kuLwesihlanu.
AmaSouth African Film and Television Awards kulindeleke ukuthi akhonjiswe kwiSABC 3 nakuMzansi Magic (161) ngoSepthemba 2 nangomhla ka-3.