INTANDOKAZI yomdlalo waku-e.tv, iScandal! ubuyisa umlingisi oke waba kuwona uRosemary Zimu.
URosemary ubuya kwiScandal! asijoyona ngo-2020 ukuzodlala indawo kaLily-Juice.
IScandal! sikhonjiswa ngo-7.30 ebusuku phakathi nesonto kwi-e.tv. Yiwona mdlalo obukwa kakhulu kulesi siteshi ngababukeli abangu-5 274 616.
“Ungena njengosomabhizinisi obheka izindlela zokukhangisa ibhizinisi lakhe elisha njengemenja yabanethalente. Ufuna usizo kuwona wonke umuntu osebenza kwithelevishini okuhlanganisa noDintle (Mapaseka Koetle) kwiZigigaba,” kusho i-e.tv.
Ngesikhathi elingisa kulo mdlalo ungene nakwiThe Queen kuMzansi Magic edlala indawo kaWarona.
Ubuya kwiScandal! nje, usematheni kulezi zinsuku ngenxa yomdlalo alingisa kuwo phambili iSavage Beauty. Kulo mdlalo oqale kule nyanga kwiNetflix, udlala indawo kaZinhle.
URosemary uzoqala namhlanje ukubonakala kwiScandal! Akuyena yedwa ofikayo njengoba kukhona noDakalo Molope odlala indawo kaMo.
UMo yindodakazi kaDintle ayishiya ukuze ithathwe ngabafuna izingane. UMo uyabuya ngemuva kweminyaka engu-14 ukuzobheka ukuthi ngubani unina.
“Uyafana nonina futhi wenza konke ukuze kungabikhona okuma endleleni yakhe. Into ayifunayo ukungena kwiZigigaba futhi lokhu kuyafezeka. Ubuza uDintle bukhoma kwithelevishini ukuthi kungani aphisana ngendodakazi yakhe eyodwa. UDintle uyahlambalazeka futhi uyahluleka ukubhekana nezinkinga zakhe aphume abaleke estudiyo.”