NOKUBONGWA PHENYANE
USHONA noConnie Ferguson sebeveze ukuthi yize kubathathe isikhathi ukuthi uphume umdlalo wabo okwabikwa ngawo ngo-2018 kodwa kubajabulisile ukuthi usuzobonakala kwiNetflix maduzane.
Umdlalo iKings of Joburg uzoqala ukudlala kwiNetflix ngoDisemba 4, uzokhonjiswa iziqephu eziyisithupha.
Kulo mdlalo baveze ukuthi kabasebenzanga bodwa kodwa kube khona nophrojusa wase-USA, uSamad Davis wenkampani iVisionary Media Inc.
UShona ongomunye wabalingisi abahamba phambili kulo mdlalo, uthe uzogxila kubantu abangabangani, abazalanayo ukuthi bathembana kanjani ezimeni ezinzima zobugebengu edolobheni iGoli.
‘’Sijabule ukuthi lo mdlalo usuthole ikhaya futhi abakuleli sebezowuthakasela. Ngesikhathi ngiqala ukuwubhala ngangifuna ugxile ezintweni ezifana nothando, umndeni, izingxabano namandla okuphatha. Abazowubuka umbuzo okumele babe nawo owokuthi kuzona zonke izinkinga, ngabe uthando lwezelamani luzozigcina zibambene njalo kuze kube sekugcineni? Okuningi engikufake kuwo engikhule ngikubuka kubaba uPeter Harry Ferguson ongasekho. Bengingalali ngiwubhala ngicabanga izinto esidlule kuzona ngisakhula ngavele ngabona ukuthi angizisebenzise ezinye zazo. Ababukeli bazomangala ukufunda ukuthi yize lo mdlalo uzobe ugcwele ukungcola kodwa kukhona okuhle okuvezayo ngeGoli. Ngiyaziqhenya ngabantu engisebenze nabo nabazinikele ukuwenza ube yimpumelelo.”
Uthe uzobe eilingisa indawo kaSimon “Vader” Masire, oyilungu leqembu iKOJ okungabafana abazalanayo kanti nguyena omdala kwaMasire.
Uveze ukuthi uSimon ungumuntu okhulumela phansi, uyabukeka futhi udumile kwezamabhizinisi.Uthe
abantu abangakwazi wukuthi njengoba ehlala egqoke kahle kukhona imfihlo enkulu ayifihlile futhi ungumuntu osondelene nomfowabo omncane uMogomotsi “Mo” Masire (Zolisa Xaluva), osanda kuphuma ejele.
UConnie uthe bazothatha ababukeli baseMzansi nase-Afrika babayise kwamanye amazwe njengoba kuzoba sengathi uqoshelwe e-USA, njengoba kukhona abalingisi bakuleli nabasemazweni ahlukene e-Afrika.
Uthe bakujabulele ukusebenza neNetflix ekukhombiseni lo mdlalo kubantu abahlukene.
Kubalingisi uthe kukhona uTK Sebothoma, Tlotlo Masire, Buhle Samuels, Angela Masire, Tsholofelo Matshaba, SK Khoza, Abdul Khoza, Nnekwa Tsajwa noCindy Mahlangu onguPhumzi.
USHONA Ferguson noZolisa Xaluva bakubalingisi abahamba phambili emdlalweni omusha iKings of Joburg ezoqala kuNetflix ngenyanga ezayo
Isithombe: SITHUNYELWE