Nokubongwa Phenyane
IZINTOKAZI ezingenisile endimeni yobumnandi uNatasha Thahane no-Ayanda MVP, bazobonakala belingisa emafilimini ahlukene akuleli esiteshini saphesheya kwezilwandle iLifetime (DStv 131).
Kulesi siteshi esikhonjiswayo nakuleli kudlala kakhulu izinhlelo zaphesheya kwezilwandle ezihlukene futhi izinhlelo zakhona eziningi zilungele umndeni wonke.
La mafilimi ahambisana nesiqubulo esithi Wild Love, azoqala ukubonakala ngoNovemba kuze kube wuDisemba.
UNatasha uzobonakala kwifilimu ekhuluma ngothando ethi My Nightmare Landlord, u-Ayanda MVP uzobonakala kwethi Looking for Mr Wonderful.
Omunye ozobonakala kumafilimu azokhonjiswa kulesi siteshi ngunina womrepha u-AKA, uLynn Forbes.
Yena uzolingisa kwifilimu ethi Merry Liddle Christmas.
UNatasha uzolingisa indawo kaLydia ozobonakala ethutha endaweni abehlala kuyona eseya kwenye, ngemva kokuhlukana nesithandwa sakhe seminyaka.
Ufika endaweni entsha azizwe engaphephile njengoba umnikazi wendawo ehlala emnaka futhi ekhombisa ukuthi umthanda kakhulu.
U-Ayanda MVP uzobonakala elingisa indawo kaLisa, ovula ikhasi elisha ezinkundleni zokuxhumana ngenxa yokuthi akafuni unina nabangani bakhe bazi ngalo njengoba esefuna ukuzitholela umaqondana.
Ngokwenza kwakhe kanjalo uzolithola isoka alithandayo kodwa ngemva kwalokho izinto kazihambi kahle empilweni kaLisa.
ULynn uthe abantu bazobona amafilimu ezobajabulisa ngesikhathi samaholidi.
“Yithuba elingandele bani leli engilitholile njengoba ngizobe ngisebenza nosaziwayo okukhona kubo uKelly Rowland olingisa indawo kaJacquie.
Kulo mdlalo ungowesifazane ongusomabhizinisi ongathandani namuntu kodwa nomndeni wakhe awuhlangene owenza konke okusemandleni ukuwuhlanganisa njengoba kusondela isikhathi samaholidi kaKhisimusi,” kuchaza yena.
Kulesi siteshi ezinye izinhlelo ezizobonakala kubalwa iMarried at First Sight US nesizini yesibili ethi Marrying Millions.