Nokubongwa Phenyane
ZIWOLE izindondo izintandokazi zemidlalo kuthelevishini, iGomora neThe River ezikhonjiswa kuMzansi Magic (DStv 161) ne-1Magic (103) kwiRoyalty Soapie Awards.
Umcimbi wezindondo ubukhonjiswa kuSABC1 ngo-8 kuya ku-10 ebusuku ngoMgqibelo, lapho bekuhlonishwa abalingisi bemidlalo ehlukene yakuleli.
Kuhlonishwe neqhaza lalabo abasebenza emikhakheni ehlukene yokukhiqizwa kwemidlalo.
Imidlalo eqoqe izindondo ezimbalwa iThe Queen ethole izindondo ezintathu, iGomora yadla ezine kwathi iThe River yakhala yemuka nezinhlanu.
Umlingisi oyisithandwa sabaningi kulezi zinsuku uSannah Mchunu uhlabane ngendondo ye-Outstanding Supporting Actress.
Lo mlingisi akandanga ngamaningi ebonga indondo, ubonge izingane zakhe eziyisikhombisa wathi zimgqugquzele, zaphinde zameseka engena kulo mkhakha.
“Ngiyabonga kakhulu kubahleli balo mcimbi ngoba le ndondo isho lukhulu kumina. Angazi ngithini, ngiyabonga kakhulu nakubalandeli bami,” kuchaza uSannah.
Omunye umlingisi ohlabane nguSicelo Buthelezi olingisa indawo kaTeddy emdlalweni iGomora, ohlabane nge-Outstanding Newcomer.
Ubonge ozakwabo asebenza kulo mdlalo.
“Ngiyabonga kakhulu kuNtobeko Sishi noSiphesihle Ndaba esibambisene nabo kahle kulo mdlalo. Ngiyabonga nakuzona zonke izinkakha zabalingisi kulo mdlalo esisebenze nazo kahle nezangifundisa lapho kumele ngenze khona kahle,” kusho uSicelo.
Omunye othole izindondo ezibalulekile nguSindi Dlathu, olingisa indawo kaLindiwe kwiThe River.
Uthole indondo ye-Outstanding Couple nozakwabo uHlomla Dandala abangabashadikazi kulo mdlalo. Wathola eye-Outstanding Female Villain.
Uzalo luhlabane ngendondo eyodwa ye-Outstanding Lead Actress, ethathwe nguDawn Thandeka King, ngendawo kaMaNgcobo.
Abanye abahlonishiwe yilaba:
Outstanding Editing Team
Isibaya
Outstanding Lighting
The Queen
Outstanding Art Direction
Getroud met Rugby
Outstanding Directing Team
Gomora
Outstanding Make-Up & Hair
The River
Outstanding Wardrobe
The Queen
Outstanding Writing Team
Skeem Saam
Most Popular Soapie of the Year (Public Vote Category)
Gomora
Outstanding Supporting Actor
Sthembiso Khoza onguShaka Khoza kwiThe Queen
Outstanding Lead Actor
Presley Chweneyagae onguCobra kwiThe River
Outstanding Male Villain
Dirk Stoltz onguDeWet Basson kwi-7de Laan
Outstanding Soapie
Binnelanders
Social Cohesion
Getroud met Rugby
Background Actor
Sphiwe Msebe
Lifetime Achievement Award
Angus Gibson