UMHOLI welinye lamaqembu ancintinisana ohlelweni iCelebrity Game Night, u-Ayanda Thabethe, uthieujabule ngokubuya kwalolu hlelo ngeSonto.
Lolu hlelo oselubuya isizini yesithathu lwethulwa ngumsakazi u-Anele Mdoda olokhu alwethula kusukela luqala.
U-Ayanda nosomahlaya uJason Goliath basuke bengabaholi bamaqembu osaziwayo abasuke bencintisana. Ohlelweni kudlalwa imidlalo ehlukene ehambisana namahlaya ukuze kukhethwe abanqobile.
Phakathi kwabazobonakala eziqeshini ezingu-10 ezidlala ihora ngumlingisi ophinde abe ngumethuli wezinhlelo zethelevishini uDineo Langa, usomahlaya uSkhumba Hlophe, umculi uLira, umlingisi uRami Chuene, usomahlaya uDavid Kau, umsakazi uMo Flava, umlingisi u-Enhle Mbali Mlotshwa nabanye abaningi.
Kuzoba ngokokuqala kulo nyaka ukuthi kube khona nabakwamanye amazwe ase-Afrika abazobonakala nge-video. Phakathi kwabo ngusomahlaya waseNigeria uJosh Alfreed obuye abizwe ngoJosh2Funny, umethuli wezinhlelo uStephanie Coker nabalingisi u-Ibrahim noLinda Suleiman.
“Ngiyajabula ngokubuya kwenye isizini egcwele ubumnandi ye #CNGAFRICA. Ngicela nicuphe izikhathi,” kusho u-Ayanda.
Uhlelo luqala ngeSonto ku-E! (DStv channel 124) ngo-8 ebusuku.
ICelebrity Game Night isuselwe ohlelweni lwaphesheya iHollywood Game Night.
Asebake babonakala kumasizini adlule kubalwa uMinnie Dlamini-Jones, Celeste Ntuli, Kelly Khumalo, Boity, Maps Maponyane, Lerato Kganyago, Lasizwe, Khanyi Mbau nabanye.